"ஆளுநருக்கான வேலையை செய்யாமல் அரசியல்வாதி போல நடக்கிறார்: செல்வப்பெருந்தகை காட்டம்!

தமிழ் மொழி அறிஞர் ராபர்ட் கால்டுவெல் குறித்து தமிழக ஆளுநர் ஆர்.என்.ரவியின் கருத்திற்கு தமிழக காங்கிரஸ் சட்டப்பேரவை தலைவர் செல்வப்பெருந்தகை கண்டனம் தெரிவித்துள்ளார்.

சென்னை: தமிழகத்திற்கும் தமிழர்களுக்கும் எவர்கள் நல்லது செய்கிறார்களோ அதைப் பொறுத்துக் கொள்ள முடியாமல், அவர்களை இழிவு படுத்தும் நோக்கத்தோடு ஆளுநர் ஆர்.என்.ரவி தொடர்ந்து பேசி வருவதாகச் சட்டப்பேரவை உறுப்பினரும், தமிழக காங்கிரஸ் சட்டப்பேரவை தலைவருமான செல்வப்பெருந்தகை தெரிவித்துள்ளார்.

இது குறித்து அவர் வெளியிட்ட கண்டன அறிக்கையில், "திருச்சியில் இன்று (அக்.23) நடைபெற்ற தனியார் நிகழ்ச்சியில் கலந்து கொண்ட ஆளுநர் 'பிரித்தாளும் கொள்கைகளுக்காகவே கால்டுவெல் போன்றவர்கள் அனுப்பப்பட்டார்கள்' என்று தமிழ்மொழிக்கும், தமிழர்களுக்கும் சிறப்பு செய்திட ராபர்ட் கால்டுவெல் என்ற மொழியியல் அறிஞரைச் சிறுமைப்படுத்தும் முயற்சியில் இழிவு படுத்தும் விதமாக ஆளுநர் பேசியிருப்பதற்கு வன்மையான கண்டனங்களைத் தெரிவித்துக் கொள்கிறேன்.

அறிஞர் ராபர்ட் கால்டுவெல் தமிழ்நாட்டில் வருவதற்கு முன்பே இந்தியாவின் தொன்மையான, சிறப்பான மொழி சமஸ்கிருதம் என்றும், தமிழ்மொழி உட்பட அனைத்து மொழிகளும் அந்த மொழியிலிருந்துதான் தோன்றியது என்ற மாயை இந்தியாவில் நிலவியது. மொழியியல் அறிஞர் ராபர்ட் கால்டுவெல் பல மொழிகளை ஆராய்ந்து, சமஸ்கிருதத்திற்கு முன்பிருந்த மொழி தமிழ்மொழி என்றும், அதன் தொன்மையையும், சிறப்பையும் ஆய்வின் மூலம் உலகத்திற்கு உணர்த்தியவர்" என்று குறிப்பிட்டு இருந்தார்.

தொடர்ந்து அவர் வெளியிட்டிருந்த அறிக்கையில், "சமஸ்கிருதம் இல்லாமல் தமிழ்மொழியால் இயங்க முடியும் என்றும் சங்க காலத்திலிருந்தே தமிழர்கள் பிற நாட்டினருடன் தொடர்பிலிருந்தார்கள் என்று முதன் முதலில் அச்சில் ஏற்றியவர். தொல்பொருள் ஆராய்ச்சியின் மூலம் பண்டைய தமிழர்களின் நாகரீகம் குறித்தும் வெளியிட்டவர். சமஸ்கிருதத்தின் முகமூடியைக் கிழித்து, தமிழ்மொழியின் சிறப்பை உலகிற்கு எடுத்துக்காட்டியவர்களை இழித்துப் பேசுவது ஆர்.எஸ்.எஸ் சித்தாந்தங்களில் மூழ்கியவர்களால் மட்டும்தான் முடியும்.

தமிழ்நாடு சட்டமன்றத்தில் இயற்றி அனுப்பிய மசோதாக்கள், தமிழ்நாடு அரசின் பரிந்துரைகள் எதையும் நிறைவேற்றாமல், ஆளுநருக்கு உரிய எந்தவொரு வேலையும் பார்க்காமல், கிடைக்கும் மேடைகளில் அரசியல்வாதி போலப் பேசுகிறார் தமிழ்நாட்டின் ஆளுநர். தமிழ்மொழிக்கும், தமிழர்களுக்கும் எவர்கள் நல்லது செய்கிறார்களோ அதை பொறுத்துக் கொள்ள முடியாமல், அவர்களை இழிவு படுத்தும் நோக்கத்தோடு பேசும் தமிழ்நாட்டின் ஆளுநர் பேசி வருகிறார்" என அறிக்கை மூலம் தெரிவித்துள்ளார்.