‘எதிர்நீச்சல்’ சீரியலால் மனமுடைந்த புகைப்பட கலைஞர்கள் - காவல் ஆணையரிடம் புகார்

தனியார் தொலைக்காட்சியில் வரும் சீரியலில், வீடியோ மற்றும் புகைப்பட கலைஞர்களை இழிவுபடுத்தும் விதமாக பேசிய நடிகர் மற்றும் இயக்குநர் மீது நடவடிக்கை எடுக்கக்கோரி காவல் ஆணையர் அலுவலகத்தில் புகார் அளிக்கப்பட்டுள்ளது.

சென்னை:தமிழ்நாடு புகைப்பட மற்றும் வீடியோ கலைஞர்கள் தொழிற்சங்கம் சார்பில் காவல் ஆணையர் அலுவலகத்தில் புகார் ஒன்று அளிக்கப்பட்டது. தொடர்ந்து, சங்கத்தின் மாநில தலைவரான வீடியோ ரமேஷ் செய்தியாளர்களைச் சந்தித்தார். அப்போது பேசிய அவர், “தனியார் தொலைக்காட்சியில் இரவு 9.30 மணிக்கு ஒளிப்பரப்பாகும் சீரியல் ஒன்றில் 34ஆவது எபிசோடில் மணவறை காட்சி ஒன்று ஒளி்பரப்பானது.

அந்த காட்சியில் நடிகர் மாரிமுத்து, புகைப்பட கலைஞர்கள் மற்றும் வீடியோ கலைஞர்களை கொச்சைப்படுத்தும் விதமாக ஒருமையில் பேசியிருக்கிறார். இந்த காட்சி அனைத்து புகைப்பட மற்றும் வீடியோ கலைஞர்களின் மனதை புண்படுத்தும் விதமாக அமைந்துள்ளது.

இதனால் தங்கள் குடும்பத்தினரும் பாதிக்கப்படுகின்றனர். எனவே தங்களை இழிவாக பேசிய நடிகர் மாரிமுத்து மற்றும் இயக்குநர் திருசெல்வம், அதே சீரியலில் மன்னிப்புக் கேட்டு, அந்த இழிவான காட்சியை உடனடியாக நீக்க வேண்டும். நடிகர் மாரிமுத்து, அந்த சீரியலின் இயக்குநர் மீதும் சட்டப்படி நடவடிக்கை எடுக்க வேண்டும்” என குறிப்பிட்டுள்ளார்.

இதையும் படிங்க:கிடைக்குமா ஜாமீன்.. ஏக்கத்தில் நடிகை மீரா மிதுன்!