மீனவர்களை பாதிக்கும் திட்டங்களை தடுத்து நிறுத்துக...!

சென்னை: மெரினா கடற்கரை, அதனைச் சுற்றியுள்ள மீனவ கிராமங்களில் மீனவர்களின் வாழ்வாதாரத்தை பாதிக்கும் வகையில் பல திட்டங்கள் நடைபெறுவதைத் தடுத்து நிறுத்தி அவர்களின் வாழ்வாதாரத்தை பாதுகாக்க வேண்டும் என்று தென்னிந்திய மீனவர் சங்கம் சார்பில் புகார் மனு அளிக்கப்பட்டுள்ளது.

இது குறித்து மீனவ சங்கத் தலைவர் பாரதி பேசுகையில், "கடற்கரை ஒழுங்குமுறை ஆணையை பெறாமல் மெரினா கடற்கரையில் மிகப்பெரிய திட்டங்கள் நடைபெற்றுவருகின்றன. மெட்ரோ ரயில் திட்டம், மெரியா லூப் சாலையில் நடக்கும் கட்டுமான பணிகள், மெரினா கடற்கரையில் சென்னை மாநகராட்சி கொண்டுவர உள்ள பல்வேறு திட்டங்கள் போன்றவற்றிற்கான அறிவிப்புகள் கொடுத்துள்ளனர். இது அங்கு பாரம்பரியமாக வசித்துவரும் மீனவ மக்களின் வாழ்வாதாரத்தை பறிக்கும். எனவே இது சம்பந்தமாக இன்று புகார் அளித்துள்ளோம்.

மேலும் 2014ஆம் ஆண்டு மெரினா லூப் சாலை போடும்போதே இது மீனவ மக்களின் வாழ்வாதாரத்தை பாதிக்கும் வகையில் இருப்பதால் இதற்கு அனுமதி தரக்கூடாது என்று புகார் அளித்திருந்தோம். அதேபோல் கடற்கரை ஒழுங்குமுறை அறிவிப்பாணையில் உள்ளூர் மீனவ கிராமங்களை குறிப்பிட்டு ஒரு வரைபடம் தயாரிக்க வேண்டும் என்று குறிப்பிடப்பட்டிருந்தது.

ஆனால் இன்றுவரை அந்த வரைபடம் தயார் செய்யப்படவில்லை. இது சம்பந்தமாக நாங்களே 2018இல் ஒரு வரைபடத்தை தயார் செய்து ஒப்புதலுக்கு அனுப்பிவைத்தோம். ஆனால் அதன்மீதும் எந்த நடவடிக்கையும் எடுக்கப்படவில்லை.

காலம் காலமாக வாழும் மீனவர்களுக்கு மீன் சந்தை கட்டிக் கொள்ளவதற்கு அனுமதி மறுக்கப்படுகின்றது. ஆனால் அதே கடற்கரையில் மாளிகை போன்ற கட்டடங்கள் கட்ட அனுமதி அளிக்கப்படுகிறது. மெரினா கடற்கரை தாரைவார்க்கப்படுவதை நிறுத்த வேண்டும். அப்படி இல்லையென்றால் கடற்கரை மண்டல் மேலாண்மை அலுவலகத்தை முற்றுகையிட்டு போராட்டங்கள் நடத்தப்படும்" என்று தெரிவித்தார்.