மூத்தத் தமிழறிஞர் இளங்குமரனார் மறைவிற்கு முதலமைச்சர் இரங்கல்!

மூத்தத் தமிழறிஞர் இளங்குமரனார் முதுமை காரணமாக நேற்றிரவு (ஜூலை 25) இயற்கை எய்தினார். அவரின், மறைவிற்கு முதலமைச்சர் மு.க. ஸ்டாலின் இரங்கல் தெரிவித்துள்ளார்.

சென்னை:மூத்தத் தமிழறிஞர் இளங்குமரனார் மதுரையில் உள்ள அவரது வீட்டில் முதுமை காரணமாக நேற்றிரவு (ஜூலை 25) இயற்கை எய்தினார். மூத்தத் தமிழறிஞரும் தமிழ் ஆசிரியருமான இளங்குமரனார், தமிழ் மொழிக்கு ஆற்றிய பெரும் தொண்டின் காரணமாக பாரதிதாசன் பல்கலைக்கழகத்தால் முதுமுனைவர் பட்டம் வழங்கி கௌரவிக்கப்பட்டார். தமிழ் இலக்கியம் தொடர்பாக 500க்கும் மேற்பட்ட நூல்களை எழுதி சாதனை படைத்தவர்.

செந்தமிழ் சொற்பொருள்களஞ்சியம் 14 தொகுதிகளும், தேவநேயப்பாவணர் குறித்த ஆய்வு நூல்களான 'தேவநேயம்' 10 தொகுதிகளும் இவரது தமிழ் தொண்டிற்கு முக்கிய சான்றுகளாய் திகழ்கின்றன.

இவரின் மறைவிற்கு முதலமைச்சர் மு.க. ஸ்டாலின் இரங்கல் தெரவித்துள்ளார். இது தொடர்பாக அவர் வெளியிட்டுள்ள இரங்கல் குறிப்பில், " தமிழையே உயிர்மூச்சாகக் கொண்டு வாழ்ந்த முதுபெரும் அறிஞரான அய்யா இளங்குமரனாரின் மறைவு தமிழ்மொழிக்கும், தமிழ்நாட்டுக்கும் ஈடுசெய்ய முடியாத பேரிழப்பாகும். இலக்கணச் செழுமையும், இலக்கிய வளமும் கொண்ட தமிழ்மொழியை அதன் பண்பாட்டைத் தமிழர்களின் இல்லந்தோறும் நிலைநிறுத்திடுவதற்காக தனது 94ஆவது அகவையில் தொடர்ந்து பணியாற்றியவர் இளங்குமரனார்.

திருக்குறள் ஓதி திருமணம்

தமிழ்மறையாம் குறள்நெறி வழியில் தமிழர்களின் திருமணங்களை முன்னின்று நடத்தியதுடன் வள்ளுவர் தவச்சாலை என்பதை நிறுவி வெள்ளுடை ஞானியாக வாழ்ந்தவர். 2000ஆண்டின் தொடக்கத்தில் முன்னாள் முதலமைச்சர் கருணாநிதி குமரி முனையில் 133 அடி உயரத்தில் அய்யன் திருவள்ளுவர் சிலையை திறந்து வைத்த மகத்தான நிகழ்வில் அய்யா இளங்குமரனார் பங்கேற்று உரையாற்றியது தனிச்சிறப்பாகும்.

வடமொழி, பிறமொழி ஆதிக்கத்திலிருந்து தமிழைப் பாதுகாக்கும் முனைப்புடன், சமஸ்கிருத மந்திரங்களை முற்றிலும் தவிர்த்து, 4 ஆயிரத்துக்கும் மேற்பட்ட திருமணங்களை திருக்குறள் ஓதியும், தமிழில் வாழ்த்தியும் நடத்தி வைத்தவர் அய்யா இளங்குமரனார்.

பழந்தமிழர் வாழ்வியல்

அடுத்தடுத்த தலைமுறைகளில் தமிழ் தழைத்திருக்க் வேண்டும் என்ற உயர்ந்த நோக்கத்துடன் 500க்கும் மேற்பட்ட நூல்களை எழுதியவர். பழந்தமிழர் வாழ்வியல் அடிப்படையில் உடல்நலன் காக்கும் முறைகளையும் அவர் தொடர்ந்து கடைபிடித்து நலவாழ்வு வாழ்ந்து அவற்றை இன்றைய இளைஞர்களும் பின்பற்றும் வழிமுறைகளைக் கற்றுத் தந்தவர். இளங்குமரனாரின் உடைபோலவே அவரது உள்ளமும் தூய்மையானது. அயாரது அவர் மேற்கொண்ட தமிழ்ப்பணி போற்றுதலுக்குரியது.

அய்யா இளங்குமரனாரின் மறைவால் வாடும் குடும்பத்தினர், உறவினர்கள், நண்பர்கள், தமிழ்ச்சான்றோர்கள் அனைவருக்கும் தமிழ்நாட்டின் முதலமைச்சர் என்ற முறையிலும் தனிப்பட்ட முறையிலும் என் ஆழ்ந்த இரங்கலைத் தெரிவித்துக்கொள்கிறேன். தமிழ் போல என்றென்றும் நிலைத்திருக்கும் இளங்குமரனாரின் இறவாப் புகழ்" எனக்குறிப்பிட்டுள்ளார்.

திருநெல்வேலி மாவட்டம் வாழவந்தாள்புரத்தில் பிறந்த இளங்குமரனார், மதுரை திருநகர் இராமன்தெருவில் உள்ள அவரது இல்லத்தில் நேற்றிரவு (ஜூலை 25) 7.30 மணிக்கு இயற்கை எய்தினார். இன்று (ஜூலை 26) மாலை 4 மணிக்கு இறுதிச் சடங்கு நடைபெறுகிறது.

இதையும் படிங்க:மூத்தத் தமிழறிஞர் இளங்குமரனார் மறைவு தமிழுக்கு பேரிழப்பு- திருமாவளவன்