சென்னை தலைமைச் செயலகத்தில் முதலமைச்சர் எடப்பாடி பழனிசாமி செய்தியாளர்களைச் சந்தித்தார்.
அப்போது அவர் கூறியதாவது, "மக்களுடைய கோரிக்கைகள் ஒவ்வொன்றாக நிறைவேற்றப்பட்டு வருகின்றன. விவசாய சங்கங்களின் பிரதிநிதிகள் என்னை சந்தித்து தாங்கள் கூட்டுறவு சங்கங்களில் வாங்கிய பயிர்க் கடனை ரத்து செய்ய வேண்டும் என கோரிக்கை விடுத்தனர். விவசாயிகளின் கோரிக்கைகளை ஏற்று அரசு 12 ஆயிரத்து 110 கோடி ரூபாய் கூட்டுறவு கடனைத் தள்ளுபடி செய்தது. இதன் மூலம் 16 லட்சத்து 43 ஆயிரம் விவசாயிகள் பயனடைவார்கள்.
வறட்சி, புயல், மழை போன்றவற்றால் விவசாயிகள் கடுமையாக பாதிக்கப்பட்டனர். இதன் காரணமாக கூட்டுறவு சங்கங்களில் விவசாயிகள் வாங்கிய கடனை அரசு ரத்து செய்தது. அதேபோல் விவசாயிகள் தங்களின் பம்பு செட்டுகளுக்கு மும்முனை மின்சாரம் அளிக்க வேண்டும் என கோரிக்கை வைத்தனர். அவர்களின் கோரிக்கையை ஏற்று ஏப்ரல் 1ஆம் தேதி முதல் விவசாய பம்பு செட்டுகளுக்கு 24 மணி நேரமும் மும்முனை மின்சாரம் அளிக்கப்படும்.
ஏழை எளிய மக்கள் குடும்ப சூழ்நிலை காரணமாக தங்களின் நகைகளை கூட்டுறவு வங்கிகளில் அடமானம் வைத்தனர். ஆகவே 6 சவரனுக்கு குறைவாக அடமானம் வைத்தவர்களுக்கு நகை கடன் தள்ளுபடி செய்ய அறிவித்து உள்ளேன். மகளிர் சுய உதவி குழுக்கள் வாங்கிய கடனை ரத்து செய்ய வேண்டுமென கோரிக்கை வைக்கப்பட்டது. அதன்படி கூட்டுறவு சங்கங்களில் மகளிர் சுய உதவி குழுக்கள் வாங்கிய கடனை ரத்து செய்ய சட்டப்பேரவையில் விதி எண் 110இன் கீழ் அறிவித்துள்ளேன். மக்கள் வைத்த கோரிக்கைகளை அரசு கவனமாக பரிசீலனை செய்து அதனை நடைமுறைப்படுத்தி வருகிறது.
ஆனால் எதிர்க்கட்சித் தலைவர் ஸ்டாலின் தான் சொல்லி முதலமைச்சர் ரத்து செய்தார் என உண்மைக்கு புறம்பாக கூறிகிறார். ஒவ்வொரு கட்சிக்கும் உள்ள கொள்கையின் அடிப்படையில் தான் செயல்படுகிறோம். திமுக ஆட்சியில் இல்லாததால் எதை வேண்டுமானாலும் சொல்லலாம். ஆனால் ஆட்சியிலுள்ள நாங்கள் அதனை சிந்தித்து தான் அறிவிப்பாக வெளியிட முடியும். இதனை அவர் தெரிந்து கொண்டு பத்திரிக்கையின் வாயிலாக அறிவிப்பு வெளியிடுகிறார். மறைந்த முதலமைச்சர் ஜெயலலிதாவின் அரசு மக்களுக்கு என்ன தேவை என்பதை உணர்ந்து செய்து வருகிறது. மக்களுக்கான திட்டங்களை செயல்படுத்தும் அரசு ஜெயலலிதாவின் அரசு.
நானும் விவசாய குடும்பம் என்பதால் மக்களின் கஷ்டங்களை அறிந்து அவர்களுக்கு உதவி செய்ய வேண்டும் என்ற அடிப்படையில் இதுபோன்ற திட்டங்களை அறிவித்து உள்ளேன்.
தமிழ்நாடு மட்டுமல்ல இந்தியா முழுவதும் உள்ள அனைத்து மாநிலங்களும் கடன் வாங்கி தான் திட்டங்களை செயல்படுத்துகின்றன. எந்த மாநிலத்திலும் கையில் நிதியை வைத்துக் கொண்டு திட்டங்களை அறிவிப்பதில்லை. மக்களின் நலன் என்பது தான் முக்கியம். மக்களின் முக்கியத்துவத்தை கருதி அரசு அறிவிப்பை வெளியிடுகிறது. மத்திய அரசும் நாடாளுமன்றத் தேர்தலின் போது பல்வேறு அறிவிப்புகளை வெளியிட்டனர். அப்போது மத்திய அரசும் கடனில் தான் இருந்தது. அதற்காக திட்டத்தை அறிவிக்காமல் இருந்தார்களா? கடன் வாங்காத மாநிலம் கிடையாது.
ஐந்து லட்சத்து 70 ஆயிரம் அரசு கடன் வாங்கியுள்ளது என்றால் வளர்ச்சி திட்டங்களுக்கு கடன் வாங்குகிறோம். கடன் வாங்கி திட்டங்களை செயல்படுத்தியதால் தான் ஜிடிபியில் உயர்ந்து உள்ளோம். உலக அளவில் பொருளாதாரம் பாதிக்கப்பட்டிருந்தாலும் தமிழ்நாட்டை மீட்டெடுத்து மக்கள் சகஜ நிலையில் வாழும் நிலையை உருவாக்கி இருக்கிறோம். இதற்கு வளர்ச்சித் திட்டங்கள் தான் பயன்பட்டது.
2015ஆம் ஆண்டு ஒரு லட்சத்து 15 ஆயிரம் கோடி கடன் இருந்தது என ஸ்டாலின் ஒப்புக்கொண்டார். இன்றைய நிலைக்கு வளர்ச்சித் திட்டங்களுக்கு உரிய செலவினங்கள் அதிகரித்து உள்ளன. திமுக ஆட்சியிலும் உலக வங்கியில் கடன் வாங்கித்தான் திட்டங்களை நிறைவேற்றினார்கள். ஆண்டுதோறும் திட்ட செலவினங்களில் மதிப்பீடு அதிகரிக்கிறது. மக்களுக்கு தேவையான திட்டங்களை அரசின் கடமை என்பதால் அதனை செய்து வருகிறோம்.