வெளிநாட்டு முதலீடுகளை ஈர்க்க தமிழ்நாடு முதலமைச்சர் பல்வேறு நடவடிக்கைகளை மேற்கொண்டுவருகிறார். அதன்படி முதலீடுகளை ஈர்க்க வெளிநாட்டு தூதுவர்களுடனான சந்திப்பு நிகழ்ச்சிகள் ஏற்பாடு, அதற்கு சிறப்பு பணிக்குழு (Special Investment Promotion Task Force) அமைத்தல் உள்ளிட்ட பல நடவடிக்கைகள் மேற்கொள்ளப்பட்டுள்ளன.
அதன் காரணமாக பல வெளிநாட்டு தொழில் நிறுவனங்கள் தமிழ்நாட்டில் முதலீடு செய்ய முடிவெடுத்தன. அண்மையில் 15 ஆயிரத்து 128 கோடி ரூபாய் முதலீட்டிற்கான 17 புரிந்துணர்வு ஒப்பந்தங்கள் பல்வேறு வெளிநாட்டு நிறுவனங்களுடன் கையெழுத்திடப்பட்டன. அதைத் தொடர்ந்து தற்போது முதலமைச்சர் எடப்பாடி பழனிசாமி முன்னணி லாஜிஸ்டிக்ஸ் (Logistics) நிறுவன தலைவர்களுக்கு தமிழ்நாட்டில் முதலீடு செய்ய அழைப்பு விடுத்து கடிதம் எழுதியுள்ளார்.