எதிர்கட்சி தலைவரின் குற்றச்சாட்டை மறுக்கிறேன் - காவல் ஆணையர் சங்கர் ஜிவால்

சட்டம் ஒழுங்கு சரியில்லை என்ற எதிர்கட்சி தலைவரின் குற்றச்சாட்டை முழுமையாக மறுப்பதாகவும், சென்னை காவல் துறை, எந்தவித அரசியல் அழுத்தங்களும் இல்லாமல் சுதந்திரமாக செயல்பட்டு வருவதாகவும் காவல் ஆணையர் சங்கர் ஜிவால் தெரிவித்துள்ளார்.

சென்னை:காவல் துறையில் மத்திய குற்றப்பிரிவில் வேலைவாய்ப்பு மோசடி தொடர்பாக 25 நபர்கள் கைது செய்யப்பட்டு மோசடிக்கு பயன்படுத்தப்பட்ட பல்வேறு உபகரணங்களும், ஆவணங்களும், போலி அரசு முத்திரைகளும் பறிமுதல் செய்யப்பட்டது. இதுதொடர்பாக சென்னை காவல் ஆணையர் அலுவலகத்தில் ஆணையர் சங்கர் ஜிவால் இன்று (ஜூன் 4) செய்தியாளர்களைச் சந்தித்தார்.

அப்போது பேசிய அவர், மத்திய மற்றும் மாநில அரசின் பல்வேறு துறைகளில் வேலை வாங்கித்தருவதாக போலி நியமன ஆணைகளை கொடுத்து, அதற்காக போலி அரசு முத்திரிகளை பயன்படுத்தி நூற்றுக்கும் மேற்பட்டவர்களை ஏமாற்றி மோசடி செய்த கும்பல் குறித்து விளக்கினார். இதுபோன்ற வழக்குகளில் அரசு துறைகளில் பணிபுரிந்து வரும் ஊழியர்களான அலுவலக உதவியாளர்கள் பலரது தொடர்பு இருப்பது தெரிய வந்திருப்பதாகவும், அதுகுறித்து விசாரிக்கப்பட்டு நடவடிக்கை எடுக்கப்படும் எனவும் அவர் தெரிவித்தார்.

தொடர்ந்து பேசிய அவர், “மத்திய குற்றப்பிரிவில் கடந்த ஒரு வருடத்தில் 79 பேர் மீது குண்டர் சட்டத்தில் நடவடிக்கை எடுக்கப்பட்டுள்ளது. மத்திய குற்றப்பிரிவு வழக்குகளில் இந்த ஒரு வருடத்தில் 190 கோடி ரூபாய் மதிப்புடைய சொத்துக்கள் பறிமுதல் செய்யப்பட்டுள்ளது. 150 கோடி ரூபாய் மதிப்பிலான சொத்துக்கள் தொடர்பான பிரச்சினைகள் தீர்த்து வைக்கப்பட்டுள்ளது” என்றார்.

சென்னையில் கடந்த ஒரு மாதத்தில் தொடர்ந்து நடந்த கொலை சம்பவம் குறித்த கேள்விக்கு, “20 நாளில் 18 கொலை என்று வெளியான புள்ளிவிபரங்கள் தவறானது. அதுமட்டுமல்லாமல், கடந்த மாதங்களில் 10 கொலை சம்பவங்கள் மட்டுமே சென்னையில் நடந்துள்ளன. அதில், 6 கொலைச் சம்பவம் குடும்பத்தகராறு காரணமாகவும், 3 முன்விரோதம் காரணமாகவும், ஒன்று மட்டுமே ரௌடி குழு மோதலால் நடந்த கொலை சம்பவம்" என அவர் விளக்கம் அளித்தார்.

மேலும், "சென்னையில் சட்டம் ஒழுங்கு சரியில்லை என்ற எதிர்க்கட்சி தலைவர் எடப்பாடி பழனிச்சாமியின் குற்றச்சாட்டை தான் முழுமையாக மறுக்கிறேன். எந்தவித அரசியல் அழுத்தங்களும் இல்லாமல் சென்னை காவல் துறை சுதந்திரமாக செயல்படுகிறது. சென்னையில் சட்டம் ஒழுங்கு பாதுகாக்க பல்வேறு நடவடிக்கைகளை மேற்கொண்டு வருகிறோம். துணை ஆணையருடன் ஆலோசித்து அறிவுரை வழங்கி நடவடிக்கை எடுத்து வருகிறோம்.

சட்டம் ஒழுங்கு சென்னையில் சிறப்பாக உள்ளது. மற்ற மாநிலங்களை ஒப்பிடுகையில் சென்னையில் சட்டம் ஒழுங்கு சிறப்பாக உள்ளது. பொதுமக்களின் புகார்கள் முறையாக விசாரித்து நடவடிக்கை எடுக்கப்பட்டு வருகிறது” என தெரிவித்தார்.

இதையும் படிங்க:Swiggy ஊழியரை தாக்கிய போக்குவரத்து காவலர் பணியிட மாற்றம்