வெளுத்துக்கட்டும் பருவமழை: புகார் தெரிவிக்க அவசர எண் அறிவிப்பு

சென்னை: வடகிழக்கு பருவமழை குறித்த புகார்கள் தெரிவிக்க அவசர எண்களை சென்னை மாநகராட்சி வெளியிட்டுள்ளது.

சென்னையில் பல்வேறு பகுதிகளில் நேற்று (அக்டோபர் 28) இரவு முழுவதும் இடி மின்னலுடன் கனமழை பெய்தது. இதனால் நகரின் பல்வேறு பகுதகளில் மழைநீர் தேங்கி வெள்ளம்போல் காட்சியளித்தது. இதனிடையே, பொதுமக்கள் வடகிழக்கு பருவமழை குறித்த புகார்கள் தெரிவிக்க அவசர எண்களை சென்னை மாநகராட்சி வெளியிட்டுள்ளது. அதன்படி, 044 2538 4530, 044 2538 4540. & 24 மணி நேரமும் இயங்கக்கூடிய கட்டுப்பாட்டு மையத்தினையும் (1913) பொதுமக்கள் தொடர்பு கொள்ளலாம் என்று சென்னை மாநகராட்சி அறிவித்துள்ளது.

சென்னையில் பல்வேறு சாலைகளில் மழைநீர் தேங்கி இருப்பதை தொடர்ந்து சென்னை மாநகராட்சி தரப்பில் விளக்கம் அளிக்கப்பட்டுள்ளது. அதில், “பெருநகர சென்னை மாநகராட்சியில் கடந்த 2014ஆம் ஆண்டு 851 இடங்களில் பருவ மழை காலங்களில் மழை நீர் தேங்கி இருந்தது. 2017ஆம் ஆண்டு பெய்த மழையால் 306 இடங்களில் மழை நீர் தேங்கி இருந்தது.

பெருநகர சென்னை மாநகராட்சியில் விரிவாக்கம் செய்யப்பட்ட இடங்களில் மண்டலம் 7, 11, 12இல் உலக வங்கி மூலமாக ரூ.1200 கோடி நிதி உதவி பெற்று 406 கிலோ மீட்டர் நீளம் மழை நீர் வடிகால் கட்டப்பட்டது. மேலும் பெருநகர சென்னை மாநகராட்சியில் விடுபட்ட, தூர்ந்து போன மழை நீர் வடிகால் 200 கிலோ மீட்டர் நீளத்திற்கு 412 இடங்களில் கட்டப்பட்டுள்ளது.

தற்போது பெய்த மழையில் மூன்றிலிருந்து 10 இடங்களில் மழை நீர் தேங்கியுள்ளது. சர்வதேச அளவில் 6 சென்டி மீட்டருக்கு மேல் கன மழை பெய்யும் போது குறைந்தது 2 மணி நேரம் மழை நீர் நின்று செல்லும். ஆனால் தற்போது பெய்த மழையால் இரண்டு மணி நேரத்திற்குள் மழை நீர் அகற்றப்பட்டது” என்று தெரிவிக்கப்பட்டுள்ளது.