சென்னை தலைமைச் செயலகத்தில் தீப்பற்றி எரிந்த கார்!

சென்னை தலைமைச் செயலகத்தில் நிறுத்தி வைக்கப்பட்டிருந்த கார் ஒன்று திடீரென தீப்பற்றி எரிந்த சம்பவம் பரபரப்பை ஏற்படுத்தியுள்ளது.

சென்னை: தலைமைச் செயலகத்தில் உள்ள புனித ஜார்ஜ் கோட்டையின் பின்புறம் உள்ள ராணுவ மைதானத்தில் வாகன நிறுத்துமிடம் உள்ளது. இந்நிலையில், இன்று (ஜூலை.27) இங்கு நிறுத்தி வைக்கப்பட்டிருந்த கார் ஒன்று திடீரென தீப்பற்றி எரிந்தது.

இதனைக் கண்ட பணியாளர்கள் உடனடியாக தீயணைப்புத் துறையினருக்கு தகவல் அளித்தனர். இந்தத் தகவலில் பேரில் விரைந்து அங்கு சென்ற தீயணைப்புத் துறையினர் தீயை கட்டுக்குள் கொண்டு வந்தனர்.

இச்சம்பவத்தில் நல்வாய்ப்பாக உயிர் சேதம் ஏதும் நிகழாத நிலையில், தீ விபத்தில் காரின் முன்பகுதி முழுவதும் எரிந்து நாசமாகியது. இந்நிலையில், காவல் துறையினர் இது குறித்து விசாரணை மேற்கொண்டு வருகின்றனர்.

இதையும் படிங்க : விசாரணைக்கு ஆப்சென்ட் ஆன அமைச்சர் செந்தில் பாலாஜி - காட்டம் தெரிவித்த நீதிபதி