கல்லூரி மாணவி கொலை விவகாரம்: காதலன் நீதிமன்றத்தில் ஆஜர்!

கல்லூரி மாணவி கழுத்தறுத்து கொலை செய்யப்பட்ட வழக்கில் கைது செய்யப்பட்டு மருத்துவமனையில் அனுமதிக்கப்பட்டிருந்த அவரது காதலனை, துப்பாக்கி ஏந்திய பலத்த பாதுகாப்புடன் நீதிமன்றத்தில் ஆஜர்படுத்த காவல் துறையினர் அழைத்துச் சென்றனர்.

சென்னை: குரோம்பேட்டை ராதாநகரைச் சேர்ந்தவர் மதியழகன். மாநகர அரசுப் பேருந்து ஓட்டுநராகப் பணியாற்றிவருகிறார். இவரது மகள் சுவேதா (25), தாம்பரத்திலுள்ள தனியார் கல்லூரியில் படித்துவந்தார்.

இந்நிலையில் நேற்று (செப். 23) கல்லூரி அருகேவுள்ள ரயில் நிலையம் செல்லும் வழியில் சுவேதாவிற்கும், திருக்குவளை பகுதியைச் சேர்ந்த அவரது காதலன் ராமச்சந்திரன் என்பவருக்கும் இடையே வாக்குவாதம் ஏற்பட்டதாகக் கூறப்படுகிறது.

வாக்குவாதத்தில் கழுத்தை அறுத்த காதலன்

இதில் ஆத்திரமடைந்த ராமச்சந்திரன், தான் மறைத்து வைத்திருந்த கத்தியை எடுத்து திடீரென சுவேதாவின் கழுத்தில் சரமாரியாகக் குத்தியுள்ளார். இதில் சம்பவ இடத்திலேயே சுவேதா உயிரிழக்க, தானும் கழுத்தை அறுத்துக்கொண்டு தற்கொலைக்கு முயன்றுள்ளார்.

இதனைக் கண்டு அதிர்ச்சியடைந்த பொதுமக்கள், நடந்த சம்பவம் குறித்து உடனடியாக சேலையூர் காவல் துறையினருக்குத் தகவல் தெரிவித்தனர். தகவலறிந்து சம்பவ இடத்துக்கு விரைந்த காவல்துறையினர், பெண்ணின் உடலை மீட்டு அரசு மருத்துவமனைக்கு அனுப்பிவைத்தனர்.

மேலும் தற்கொலைக்கு முயன்ற ராமச்சந்திரனை குரோம்பேட்டை அரசு மருத்துவமனையில் சிகிச்சைக்காக அனுமதித்தனர்.

பலத்த பாதுகாப்புடன் நீதிமன்றத்தில் ஆஜர்

இந்த சம்பவம் 2016 ஆம் ஆண்டு, நுங்கம்பாக்கம் ரயில் நிலையத்தில் கொலை செய்யப்பட்ட சுவாதி கொலை வழக்கு பாணியிலேயே நடைபெற்றிருப்பது பலரையும் அதிர்ச்சிக்குள்ளாக்கியது.

இந்நிலையில் இன்று (செப்.24) மருத்துவமனையில் அனுமதிக்கப்பட்டிருந்த உயிரிழந்த பெண்ணின் காதலன் ராமச்சந்திரனை, துப்பாக்கி ஏந்திய பலத்த பாதுகாப்புடன் நீதிமன்றத்தில் ஆஜர்படுத்துவதற்காக அழைத்துச் சென்றனர்.

இதையும் படிங்க:குஜராத்தில் சிலிண்டர் வெடித்து தந்தை மகன் உயிரிழப்பு