‘அரசியல் சாசனத்தை சிதைப்பது பாஜக அரசு தான்’ - ப. சிதம்பரம்

பிஜேபி அரசு அரசியல் சாசனத்தை நிச்சயமாக திருத்தும், அழிக்கும், இல்லையென்றால் சிதைக்கும். இதை செய்ய மாட்டார்கள் என நம்பாதீர்கள், அப்படி நம்பினால் நம்மை விட முட்டாள்கள் யாரும் இருக்க முடியாது என ப. சிதம்பரம் தெரிவித்துள்ளார்.

சென்னை:காங்கிரஸ் கட்சி சார்பில் சென்னை ராயப்பேட்டையில் உள்ள அக்கட்சியின் அலுவலகமான சத்தியமூர்த்தி பவனில் இருந்து ஸ்ரீபெரும்புதூர் வரை இந்திய அரசியல் அமைப்பு பாதுகாப்பு வேண்டி தமிழ்நாடு காங்கிரஸ் கட்சியின் 8 அமைப்புகள் இணைந்து தலைவர் கே.எஸ். அழகிரி தலைமையில் 75 கிலோ மீட்டர் நடைபயணம் நடைபெறவுள்ளது.

இதன் தொடக்க விழா சத்தியமூர்த்தி பவனில் நடைபெற்றது. இதில் நாடாளுமன்ற உறுப்பினர் ப.சிதம்பரம், திக் விஜய் சிங், சல்மான் குர்ஷித், தமிழ்நாடு முன்னாள் காங்கிரஸ் கமிட்டி தலைவர் திருநாவுக்கரசர், குமரி ஆனந்தன், தமிழ்நாடு காங்கிரஸ் கமிட்டி சட்டமன்ற உறுப்பினர்கள் செல்வப்பெருந்தகை உள்ளிட்டோர் பலர் இந்த நிகழ்ச்சியில் கலந்து கொண்டுள்ளனர்.

இந்நிகழ்ச்சி தொடக்க விழாவின்போது பேசிய, முன்னாள் மத்திய நிதித்துறை அமைச்சரும் தற்போது நாடாளுமன்ற உறுப்பினருமான ப.சிதம்பரம்:"அரசியலமைப்பு சட்டத்தை எழுதியவர் அண்ணல் அம்பேத்கார். தலைமையில் உள்ள 70 பேரில் இருவர் தமிழர் என்பது பெருமை, மல்லாடி கிருஷ்ணசாமி, என்.கோபால்சாமியும் ஆவார். நாடாளுமன்ற படியை தொட்டு வணங்கி விட்டு, மைய அவையில் அரசியல் சாசன நூலை வணங்கி விட்டு பிரதமராக மோடி பதவியேற்று எட்டு ஆண்டுகளாக செயல்படுகிறார்.

அரசியல் சாசன நூலை வழங்கிவிட்டு பிரதமராக பதவி ஏற்றுக்கொண்டார் என்பதற்காக இந்த அரசியல் சாசனம் மீது அவருக்கு நம்பிக்கை உள்ளது என்று மட்டும் நினைத்து விடக்கூடாது. இந்து மகா சபை, பாரதிய ஜனசங்கம், பாஜக உள்ளிட்ட யாருமே அரசியல் சாசன வடிவமைப்பில் உறுப்பினர் கிடையாது. ஆகையால் எங்களது பங்களிப்பு இல்லாத காரணத்தால் இதனை நாங்கள் ஏற்றுக்கொள்ள மாட்டோம் என தெரிவிக்கின்றனர்.

அரசியல் சாசனத்தை வடிவமைத்தது நாம், அதனை சிதைப்பது இன்றைய பாஜக அரசு, ஆகையால் அரசியல் சாசனத்தை சிதைக்கிறார்கள், அழிக்கிறார்கள். நாடாளுமன்ற மாநிலங்களவை 3ல் இரண்டு பங்கு ஆதரவு, பெருபான்மை இல்லை. இந்த தடை மட்டும் இல்லையென்றால் அரசியல் சாசனத்தை மாற்றுவார்கள், அழிப்பார்கள், திருத்துவார்கள்.

அடிப்படையாக 14,19, 21, 25,26 ஆகிய அடிப்படையாக உள்ள ஐந்து சரத்துகளை நிச்சயமாக திருத்தும், அழிக்கும், சிதைக்கும். இதை செய்ய மாட்டார்கள் என நம்பாதீர்கள், அப்படி நம்பினால் நம்மை விட முட்டாள்கள் யாரும் இருக்க முடியாது. நிச்சயமாக செய்வார்கள், ஆகையால் இதை தடுக்க நாட்டில் உள்ள அனைவருக்கும் உணர்வு வர வேண்டும்.

அரசியல் சாசனத்தை திருத்தக் கூடாது என்று அனைவரும் ஒன்றாக கருத்து தெரிவிக்க வேண்டும் அப்படி திருத்த நினைத்தால் அனைத்து மாநிலங்களுக்கும், அனைத்து அரசியல் கட்சிகளும் ஏற்றவாறு திருத்த வேண்டும். அனைத்து மாநிலங்களும், பெண்களும் ஏற்றும் வகையில் திருத்தினால் அதை மட்டுமே ஏற்றுக்கொள்ள வேண்டும்.

ஒரு கட்சியின் மிருக பலத்தை வைத்து அவர்கள் தங்களது பெரும்பான்மையை நிரூபித்து விட்டால் மட்டும் நாம் ஏற்றுக்கொள்ள கூடாது. ஆகையால் அரசியல் சாசனத்தை காப்பாற்றுவோம். 24 நாள்கள் காந்தி நடைபயணம் மேற்கொண்டார். ராகுல் காந்தி 150 நாள்கள் பாத யாத்திரை பயணம் மேற்கொள்கிறார். அதற்கு துணையாக இந்த நடைபயணம் உதவும்" என தெரிவித்தார்.

இதையும் படிங்க:காலநிலை மாற்றம் கடல் சுற்றுச்சூழல் அமைப்புகளுக்கு பெரும் அச்சுறுத்தலாக உள்ளது - பிரதமர் மோடி