பேருந்து மோதி விபத்து; பைக்கில் சென்றவர் பலி

சென்னையில் இருசக்கர வாகனத்தில் சென்றவர் மீது மாநகர பேருந்து மோதியதில் அவர் சம்பவ இடத்திலேயே பலியானார்.

சென்னை: கோயம்பேடு முதல் தாம்பரம் வரை செல்லும் 70 எண் கொண்ட மாநகர பேருந்தானது, வடபழனி 100 அடி சாலை வழியாக நேற்றிரவு சென்று கொண்டிருந்தது. குறிப்பாக மேம்பாலத்தின் மீது வேகமாக சென்ற போது திடீரென கட்டுப்பாட்டை இழந்த பேருந்து, முன் சென்ற இருசக்கர வாகனத்தின் வலதுபுறம் மோதி உள்ளது.

இதில் கட்டுப்பாட்டை இழந்த இருசக்கர வாகனத்தில் வந்த நபர் நிலைதடுமாறி கீழே விழுந்த போது, அதே பேருந்தின் பின்சக்கரத்தில் சிக்கி தலை நசுங்கி சம்பவ இடத்திலேயே பலியானார். இதனையடுத்து அங்கு சென்ற பாண்டி பஜார் போக்குவரத்து போலீசார் , உடலை மீட்டு கீழ்ப்பாக்கம் அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.

இறந்தவர் விருகம்பாக்கம் காந்தி நகரை சேர்ந்த கார் ஓட்டுனர் புகழேந்தி(35) என்பதும், இருசக்கர வாகனத்தில் ஹெல்மெட் அணியாமல் வீட்டிற்கு சென்ற போது விபத்து நிகழ்ந்திருப்பதும் தெரியவந்தது. இதனையடுத்து பேருந்தை ஓட்டி வந்த அம்பத்தூரை சேர்ந்த சக்திமான் என்பவரை போலீசார் கைது செய்து விசாரணை நடத்தி வருகின்றனர்.

இதையும் படிங்க:தூத்துக்குடியில் பயங்கரம் : வி.சி.க. பிரமுகர் ஓட ஓட வெட்டிக் கொலை..