அயனாவரம் ரவுடி சங்கர் என்கவுன்ட்டர்: நாளை இரண்டாம் கட்ட விசாரணை

சென்னை: என்கவுன்ட்டர் செய்யப்பட்ட சங்கருக்கு வாடகைக்கு வீடு எடுக்க உதவிய விஜயா என்பவரிடம் நாளை (அக்.12) காலை 10 மணிக்கு இரண்டாம் கட்ட விசாரணை நடைபெற உள்ளது.

சென்னை அயனாவரம் நியூ ஆவடி சாலையில் கடந்த செப்டம்பர் மாதம் 21ஆம் தேதி ரவுடி சங்கர் என்கவுன்ட்டரில் சுட்டுக் கொல்லப்பட்டார். அயனாவரம் காவல் ஆய்வாளர் நடராஜ் தலைமையில் நடைபெற்ற இந்த என்கவுன்ட்டர் திட்டமிட்ட படுகொலை என சங்கரின் உறவினர்கள் குற்றஞ்சாட்டினர். இது தொடர்பாக நீதிமன்றத்தில் வழக்கு தொடுத்திருந்தனர்.

மனித உரிமைகள் ஆணைய விதிகளின்படி, என்கவுன்ட்டர் செய்யப்பட்ட காவல் துறை சார்ந்தவர்களே வழக்கை விசாரிக்க முடியாது என்பதால் டிஜிபி உத்தரவின் படி, வழக்கு சிபிசிஐடிக்கு மாற்றப்பட்டது. சிபிசிஐடி விசாரணை அலுவலராக டிஎஸ்பி கண்ணன் நியமிக்கப்பட்டு விசாரணையை தொடங்கினார்.

கீழ்ப்பாக்கம் உதவி ஆணையர் ராஜா, காவல் ஆய்வாளர் நடராஜ் உள்பட 11 காவல் துறையினர், இரண்டு சாட்சியங்கள் என 13 பேர் சிபிசிஐடி காவல் துறையினர் முன்னிலையில் ஆஜராகி தங்கள் விளக்கத்தினை அளித்தனர்.

இந்த வழக்கு தொடர்பாக, சென்ற மாதம் சிபிசிஐடி அலுவலகத்தில் சங்கரின் தாயார் கோவிந்தம்மாள், சகோதரி ரேணுகா, அவரது மகன் மோகன், சங்கரின் அண்ணி உஷா ஆகிய 4 பேரும் ஆஜராகி சுமார் ஒன்றரை மணி நேரம் தங்கள் விளக்கத்தை அளித்தனர். முன்னதாக அயனாவரம் வீட்டிலும் சிபிசிஐடி காவல் துறையினர் விசாரணை நடத்தினர்.

சங்கர் என்கவுன்ட்டர் அன்று தோழி ராணி, ராணியின் மகன் திலீபன் ஆகியோரையும் கஞ்சா வழக்கில் கைது செய்து காவல் துறையினர் புழல் சிறையில் அடைத்தனர். இதனையடுத்து இந்த வழக்கில் தொடர்புடையவர்கள் என்கிற அடிப்படையிலும் ரவுடி சங்கர் கைது செய்யப்பட்டபோது உடன் இருந்தவர்கள் என்கிற அடிப்படையிலும், புழல் சிறையில் உள்ள ராணி, திலீப், தினகரன் ஆகியோரிடமும் சிபிசிஐடி காவல் துறை ஏற்கெனவே விசாரணை நடத்தியது.

இந்நிலையில் ஈஞ்சம்பாக்கத்தில் சங்கர் தங்கியிருந்த வீட்டை வாடகைக்கு எடுக்க உதவிய விஜயா என்பவரிடம் இரண்டாம் கட்ட விசாரணை நாளை (அக்.12) நடைபெற உள்ளது. இது தொடர்பாக அவருக்கு சம்மன் அனுப்பப்பட்டுள்ளது. இதன் பேரில் அவர் நாளை காலை 10 மணிக்கு சிபிசிஐடி அலுவலகத்தில் இரண்டாம் கட்ட விசாரணைக்கு ஆஜராக உள்ளார்.

சிறையில் இருந்து வெளியே வந்துள்ள தோழி ராணி, அவரது மகன் திலீபன், சங்கருடன் இருந்த தினகரன் ஆகியோர் சிபிசிஐடி அலுவலகத்தில் மாதம் ஒருமுறை ஆஜராகி கையெழுத்திடவும் உத்தரவிடப்பட்டுள்ளது. அதன் பேரில் நாளை ஆஜராகி கையெழுத்திட உள்ளனர்.

இதையும் படிங்க:அயனாவரம் ரவுடி சங்கர் என்கவுன்ட்டர் வழக்கு : 12 வாரத்தில் வழக்கை முடிக்க சிபிசிஐடிக்கு நீதிமன்றம் உத்தரவு!