ஆசிய தடகளப் போட்டியில் தமிழ்நாட்டை சேர்ந்த கோமதி மாரிமுத்து தங்கப் பதக்கம் வென்றார். தமிழ்நாடு அரசு, அரசியல் கட்சியினர், தனியார் அமைப்புகள் மற்றும் சினிமா பிரபலங்கள் சார்பாக அவருக்கு பரிசு தொகைகள் மற்றும் நிதியுதவி வழங்கப்பட்டன.
இதன்தொடர்ச்சியாக நேற்று சென்னை வேப்பேரியில் உள்ள காவல் ஆணையர் அலுவலகத்தில் தங்கப்பதக்கம் வென்ற கோமதிக்கு பாராட்டு நிகழ்ச்சி நடைபெற்றது.
பின்னர் கோமதி மாரிமுத்து செய்தியாளர்களை சந்தித்தார். அப்போது பேசிய அவர், ஆசிய தடகள போட்டியில் 800மீ ஓட்டப்பந்தயத்தில் தங்கம் பதக்கம் வென்றது மகிழ்ச்சி அளித்திருப்பதாகவும், ஆர்வம் இல்லாமல் இருந்த என்னை பயிற்சியாளர் ஊக்குவித்ததால்தான் தங்கப் பதக்கம் வெல்ல முடிந்ததாகவும் தெரிவித்தார்.
மேலும், ஒலிம்பிக்கில் தங்கப்பதக்கம் வெல்வதே குறிக்கோள் என்றும், தமிழக விளையாட்டு வீரர்களுக்கு தமிழ்நாட்டிலேயே வேலை கொடுக்க வேண்டும் எனவும் அவர் தமிழக அரசுக்கு வேண்டுகோள் விடுத்தார்.