சென்னை: விமான நிலையத்தில் பாஜக மாநிலத் தலைவர் அண்ணாமலை செய்தியாளர்களைச் சந்தித்தார்.
அப்போது அவர், "திமுக தேர்தல் வாக்குறுதியில் கொடுத்த பெட்ரோல். டீசல் விலை குறைப்பை நிறைவேற்றாததால் அதிமுகவினர் இன்று (ஜூலை 28) மாநிலம் முழுவதும் போராட்டம் நடத்தி வருகின்றனர். அவர்களின் போராட்டம் வெற்றி பெற வேண்டும்.
திமுக தேர்தல் அறிக்கையில் குறிப்பிட்டிருந்த எந்த ஒரு வாக்குறுதிகளையும் இதுவரை நிறைவேற்றவில்லை. ஆட்சிக்கு வந்து 75 நாள்கள் கடந்தும் முழுமையாக ஒரு கோரிக்கையையும் நிறைவேற்றவில்லை.
பெட்ரோல், டீசல் விலையில் இருந்து நீட் தேர்வு வரை அனைத்தையும் கூறி விட்டு தற்போது அதற்கெல்லாம் ஒரு காரணத்தைச் சொல்லி வருகின்றனர்.
தமிழ்நாட்டில் எப்போதும் தேர்தல் வாக்குறுதியை எதிர்பார்த்து ஒரு பெரிய வாக்கு வங்கி உள்ளது. இதனால் பொய்யான வாக்குறுதிகளை கூறி திமுக ஆட்சிக்கு வந்துள்ளார்கள் என்பதில் எந்த மாற்றுக் கருத்தும் இல்லை.
வரும் வெள்ளிக்கிழமை (ஜூலை 30) பாஜக மீனவர் அணி சார்பில் திமுகவினர் மீனவர்களுக்கு எதிராக எடுக்கும் செயல்பாடுகளைக் கண்டித்து போராட்டம் நடைபெற உள்ளது. அதைத்தொடர்ந்து ஆகஸ்ட் மாதம் டெல்டா மாவட்டங்களில் போராட்டம் நடத்த உள்ளோம்.
தேர்தல் வாக்குறுதிகளை திமுக நிறைவேற்றவில்லை பெட்ரோல், டீசல் விலையை குறைக்க மத்திய அரசு அனைத்து முயற்சிகளையும் எடுத்து வருகிறது. பெட்ரோல், டீசல் விலை அதிகரிப்பை பாஜகவும் ஏற்றுக்கொள்ளவில்லை, அதை குறைப்பதற்கான நடவடிக்கை எடுக்கப்பட்டு வருகிறது.
மத்திய அரசு பெட்ரோல், டீசலை ஜிஎஸ்டிக்குள் கொண்டுவர தயார். இதை மத்திய பெட்ரோலியத்துறை அமைச்சர் பல இடங்களில் கூறியுள்ளார். இதனை தமிழ்நாடு நிதியமைச்சர் ஏற்க வேண்டும், அதற்குப் பிறகு பார்க்கலாம்.
மத்திய அரசு சொன்னதுபோல் முயற்சி எடுத்து பெட்ரோல், டீசல் விலையை குறைப்போம்" என்றார்.
இதையும் படிங்க:வன்னியர்களுக்கான 10.5 % இட ஒதுக்கீடு இந்தாண்டு அமல்?
