வழக்கு தொடுத்தவரின் பின்னணியில் நான் இல்லை - துணைவேந்தர் சூரப்பா

சென்னை: தனக்கு ஆதரவாக சென்னை உயர் நீதிமன்ற மதுரை கிளையில் வழக்கு தொடுத்தவரின் பின்னணியில் நான் இல்லை என அண்ணா பல்கலைக்கழக துணைவேந்தர் சூரப்பா விளக்கமளித்துள்ளார்.

அண்ணா பல்கலைக்கழக துணைவேந்தர் சூரப்பா, தனது அதிகாரத்தை தவறாக பயன்படுத்தி பல்வேறு முறைகேடுகளில் ஈடுபட்டுள்ளதாக அரசுக்கு புகார்கள் வந்தன. குறிப்பாக, அவரது மகளுக்கு முறைகேடாக பல்கலைக்கழகத்தில் பணி வழங்கப்பட்டிருப்பதாக குற்றச்சாட்டு எழுந்தது.

இதனையடுத்து ஓய்வு பெற்ற உயர் நீதிமன்ற நீதிபதி கலையரசன் தலைமையில், சூரப்பா மீதான புகார்கள் குறித்து விசாரிக்க ஆணையம் ஒன்றை அமைத்து தமிழ்நாடு அரசு உத்தரவிட்டது.

இந்நிலையில் சூரப்பா மீதான விசாரணையை நிறுத்தி வைக்க வேண்டும் என கன்னியாகுமரி மாவட்டத்தைச் சேர்ந்த மணி தணிகை குமார் என்பவர் சென்னை உயர் நீதிமன்ற மதுரை கிளையில் வழக்கு தொடர்ந்துள்ளார்.

இந்த வழக்கில் தன்னையும் மனுதாரராக சேர்க்க வேண்டும் என அண்ணா பல்கலைக்கழக துணைவேந்தர் சூரப்பா மனு தாக்கல் செய்துள்ளார்.

இது குறித்து செய்தியாளர்களிடம் கருத்து தெரிவித்த உயர்கல்வித் துறை அமைச்சர் கே.பி.அன்பழகன், உயர் நீதிமன்ற மதுரை கிளைவரை சென்று சூரப்பா தன்னை மனுதாரராக ஏன் இணைக்க வேண்டும். வழக்கு தொடுத்தவரின் பின்னணியில் சூரப்பா இருப்பதாக குற்றஞ்சாட்டினார்.

இது குறித்து சூரப்பா பேசுகையில், மதுரை உயர் நீதிமன்றத்தில் தனக்கு ஆதரவாக வழக்கு தொடுத்தவர் பின்னணியில் நான் இல்லை. அந்த நபர் யாரென்று தெரியாது. மற்றவர்கள் பின்னணியிலிருந்து செயல்பட வேண்டிய அவசியம் எனக்கு இல்லை என்றார்.