சென்னை: அம்பேத்கர் மக்கள் இயக்கத்தின் செயல் தலைவர் இளமுருகு முத்து, திரைப்பட இயக்குனர் ரத்னகுமார், நடிகர் சித்ரா லட்சுமணன் மீது தமிழ்நாடு காவல் துறை டிஜிபி அலுவலகத்தில் புகார் ஒன்றை கொடுத்தார்.
பின்னர் செய்தியாளர்களிடம் பேசிய இளமுருகு, “கடந்த பிப்ரவரி மாதம் நடிகர் சித்ரா லட்சுமணன், தான் நடத்தும் "சாய் வித் சித்ரா" (Chai with chithra) என்ற யூ டியூப் சேனல் நிகழ்ச்சியில், திரைப்பட கதாசிரியரும் இயக்குநருமான ரத்னகுமாரை வைத்து பேட்டி எடுத்தார். இந்த பேட்டியில் ரத்னகுமார் இசைஞானி இளையராஜாவை அவரது சாதியை மையமாக வைத்து இழிவாக பேசினார். அதை சித்ரா லட்சுமணனும் அனுமதித்துள்ளார்.
இது தொடர்பாக மார்ச் மாதம் ரத்னகுமார் மற்றும் சித்ரா லட்சுமணன் மீது வன்கொடுமை தடுப்பு சட்டத்தின் கீழ் கைது செய்து நடவடிக்கை எடுக்கக்கோரி புகார் கொடுத்தோம். ஆனால் எந்த நடவடிக்கையும் எடுக்கப்படவில்லை. அதனால் மீண்டும் இன்று புகார் அளிக்க வந்துள்ளோம்.