பேரவையின் மாற்றுத்தலைவர்களை அறிமுகம் செய்து வைத்த சபாநாயகர்

சட்டப்பேரவையின் மாற்றுத்தலைவர்களாக அன்பழகன், ராமகிருஷ்ணன், உதயசூரியன், எஸ்.ஆர்.ராஜா, டி.ஆர்.பி.ராஜா, துரைசந்திரசேகரன் ஆகியோரை மாற்றுத்தலைவர்களாக சபாநாயகர் அப்பாவு அறிவித்துள்ளார்.

சென்னை கலைவாணர் அரங்கத்தில் இரண்டாம் நாள் சட்டப்பேரவைக் கூட்டம் இன்று நடைபெற்றது. சட்டப்பேரவைத் தலைவர் அப்பாவு இரங்கல் குறிப்புகளை வாசித்தார்.

இரங்கல் தீர்மானம் வாசிப்பு:

அப்போது மு.பாண்டுரங்கன், அ. முஹம்மத் ஜான் உள்ளிட்ட 13 சட்டப்பேரவையின் முன்னாள் உறுப்பினர்களின் மறைவிற்கு இரங்கல் தீர்மானம் நிறைவேற்றப்பட்டது. மேலும் பிரபல திரைப்பட நடிகர் மற்றும் சமூக ஆர்வலர் விவேக், எழுத்தாளர் கி.ராஜநாராயணன், கி . துளசி அய்யா வாண்டையார், சுதந்திரப் போராட்ட வீரரும் இந்திய அரசியல் நிர்ணய உறுப்பினருமான டி.எம். காளியண்ணன் ஆகியோரின் மறைவு குறித்து இரங்கல் தீர்மானங்கள் வாசிக்கப்பட்டன.

நடிகர் விவேக்கிற்கு புகழாரம் சூட்டிய சபாநாயகர்:

நடிகர் விவேக் மறைவு திரையுலகிற்கும் பேரவைக்கும் பெரிய இழப்பு; விவேக் மரம் நடுதல் உள்ளிட்ட சமூகப் பணிகளில் ஈடுபட்டவர், 'சின்ன கலைவாணர்' என்றழைக்கக்கூடியவர், என்று சபாநாயகர் அப்பாவு புகழாரம் செலுத்தினார்.

விவேக்

பின்னர் சட்டப்பேரவையில் 2 நிமிடம் மவுன அஞ்சலி செலுத்தப்பட்டது.
இதனைத்தொடர்ந்து,சட்டப்பேரவையின் மாற்றுத்தலைவர்களாக அன்பழகன், ராமகிருஷ்ணன், உதயசூரியன், எஸ்.ஆர்.ராஜா, டி.ஆர்.பி.ராஜா, துரை சந்திர சேகரன் ஆகியோரை பேரவையின் மாற்றுத்தலைவர்களாக சபாநாயகர் அப்பாவு அறிவித்துள்ளார்.