அதிமுக பொதுக்குழுவில் நடந்தது என்ன? - முழுத்தகவல் தொகுப்பு!

சென்னையில் மிகுந்த சலசலப்பில் மத்தியில் இன்று நடைபெற்ற, அதிமுக பொதுக்குழு கூட்டத்தின் சுவாரசிய நிகழ்வுகளின் தொகுப்பை காணலாம்

சென்னை:அதிமுக பொதுக்குழு மற்றும் செயற்குழுக்கூட்டம் ஸ்ரீவாரு வெங்கடாஜலபதி திருமண மண்டபத்தில் அக்கட்சியின் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி, அவைத்தலைவர் தமிழ்மகன் உசேன் ஆகியோர் தலைமையில் நடைபெற்றது. இதில் முன்னாள் அமைச்சர்கள் சி.வி. சண்முகம், ஜெயக்குமார், மூத்த கட்சித் தலைவர்கள் பங்கேற்றனர்.

முன்னதாக மண்டபத்தில் ஓ.பன்னீர்செல்வம், எடப்பாடி பழனிசாமி ஆதரவாளர்கள் மாறிமாறி முழக்கங்களை எழுப்பினர். திருமண மண்டபம் வந்த ஓ.பன்னீர்செல்வத்திற்கு எதிராக பல்வேறு முழக்கங்கள் எழுப்பப்பட்டன. இதனால் அந்தப் பகுதியில் சிறிதுநேரம் சலசலப்பு ஏற்பட்டது. ஓ.பன்னீர் செல்வத்தை வெளியேறச்சொல்லி பழனிசாமி ஆதரவாளர்கள் முழக்கமிட்டனர்.

ஒற்றைத்தலைமை முழக்கம்: மேலும் ஓ.பன்னீர்செல்வம் மேடையில் இருக்கும்போதே, அவர் முன்னிலையில் ஒற்றைத்தலைமை வேண்டும் என முழக்கமிட்டதால் பரபரப்பு ஏற்பட்டது. தொண்டர்களில் சிலர் ’துரோகி' என முழக்கமிட்டதால் பொதுக்குழு மேடையில் இருந்து கீழே வைத்திலிங்கம் இறங்கினார். அனைவரும் அமைதி காக்க வேண்டும் என முன்னாள் அமைச்சர் ஆர்.பி. உதயகுமாரும், வளர்மதியும் தொண்டர்களிடம் கேட்டுக்கொண்டனர்.

அதிமுக பொதுக்குழுவில் நடந்தது என்ன?

அதிமுக பொதுக்குழுவில் உறுப்பினர்கள் வாக்குவாதத்தில் ஈடுபட்டனர். இரு தரப்பு உறுப்பினர்களின் வாக்குவாதத்தால் அதிமுக பொதுக்குழு நடைபெறும் மண்டபத்தில் பரபரப்பு ஏற்பட்டது. பொதுக்குழு உறுப்பினர்கள் அமைதி காக்க அதிமுக மூத்தத்தலைவர்கள் வேண்டுகோள் விடுத்தனர்.

அனைத்து தீர்மானங்களும் நிராகரிப்பு:அதிமுக பொதுக்குழு கூட்டத்தில் அதிமுகவின் அவைத்தலைவராக தமிழ்மகன் உசேன் ஒருமனதாக தேர்வு செய்யப்பட்டுள்ளார் என ஓ.பன்னீர்செல்வம் முன்மொழிந்த தீர்மானத்தை வழிமொழிவதாக எடப்பாடி பழனிசாமி தெரிவித்தார். 2,190 பொதுக்குழு உறுப்பினர்கள் கையொப்பமிட்டுள்ள கோரிக்கை விண்ணப்பத்தினை சி.வி.சண்முகம் வாசித்தார்,

'இரட்டைத்தலைமையால் கடுமையாக திமுகவை எதிர்த்துச்செயல்பட முடியாமல் உள்ளது. இரட்டைத்தலைமையின் ஒருங்கிணைப்பு இல்லாத செயல்பாட்டால் தொண்டர்கள் சோர்வடைந்துள்ளனர். நூறாண்டு காலம் அதிமுக நீடிக்க எம்.ஜி.ஆர், ஜெயலலிதா போன்ற ஒற்றைத்தலைமைப்போன்று ஒன்று வேண்டும். இப்பொதுக்குழுவில் இரட்டைத்தலைமையை ரத்து செய்து, ஒற்றைத்தலைமை தேவை என வலியுறுத்தி கோரிக்கை விடப்படுகிறது. இப்பொதுக்குழுவில் அடுத்த பொதுக்குழுவிற்கான தேதியை அறிவிக்க வேண்டும்' எனத் தெரிவித்தார்.

பின்னர் பேசிய அதிமுகவின் துணை ஒருங்கிணைப்பாளர் கே.பி.முனுசாமி, “பொதுக்குழு உறுப்பினர்கள் அனைத்து தீர்மானங்களையும் நிராகரித்துவிட்டனர்; அனைத்து உறுப்பினர்களின் கோரிக்கை 'ஒற்றைத் தலைமை வரவேண்டும்' என்பது தான். ஒற்றைத் தலைமை வேண்டும் என்ற தீர்மானத்தோடு சேர்த்து எப்போது மீண்டும் பொதுக்குழு கூட்டப்படுகிறதோ, அப்போதுதான் அது நிறைவேற்றப்படும்’ எனத் தெரிவித்தார்.

அதிமுக-வின் அடுத்த பொதுக்குழு கூட்டம் வரும் ஜூலை 11ஆம் தேதியன்று காலை 9.15 மணிக்குக் கூடும். பெரும்பான்மையான பொதுக்குழு உறுப்பினர்களின் கோரிக்கையை ஏற்று அறிவிப்பதாக அதிமுக அவைத்தலைவர் தமிழ்மகன் உசேன் மேடையில் தெரிவித்தார்.

பொதுக்குழு கூட்டத்தை புறக்கணித்த ஓபிஎஸ்: இதனையடுத்து அதிமுக பொதுக்குழுக் கூட்ட மேடையிலிருந்து ஓ.பன்னீர் செல்வம் மற்றும் அவரது ஆதரவாளர்கள் வெளியேறினர். மேலும் சட்டத்துக்கு புறம்பான பொதுக்குழுவை நிராகரிப்பதாக மேடையில் வைத்திலிங்கம் தெரிவித்தார்.

பின்னர் ஓ.பன்னீர்செல்வம் வெளியில் வரும்போது தீர்மானத்தின் நகல் மற்றும் தண்ணீர் பாட்டில்கள், காகிதம் ஆகியவை அவர் மீது வீசப்பட்டன. இதனால் அங்கு சற்று நேரம் பரபரப்பு தொற்றிக்கொண்டது.

அதிமுக பொதுக்குழுவில் நடந்தது என்ன?

அதிமுக வரலாற்றில் முதன்முறை: சென்னையில் நடந்த அதிமுக பொதுக்குழுவில் ஓ.பன்னீர் செல்வம் முன்மொழிந்த 23 தீர்மானங்களும் நிராகரிக்கப்பட்டன. அதிமுகவின் 50 ஆண்டுகள் கால வரலாற்றில் பொதுக்குழுவில் அந்த கட்சி கொண்டு வரும் அனைத்து தீர்மானங்களும் நிராகரிக்கப்படுவது இதுவே முதன்முறையாகும்.

முன்னாள் முதலமைச்சர் எம்ஜிஆர் காலத்திலும், ஜெயலலிதா காலத்திலும் பொதுக்குழுவின் தீர்மானங்கள் நிராகரிக்கப்பட்டதில்லை என்பது குறிப்பிடத்தக்கது.

இதையும் படிங்க:முன்னாள் அமைச்சர் செய்த காரியத்தால் கடுப்பான ஈபிஎஸ்