"ஆடு நனைகிறது என ஓநாய் கவலைப்பட வேண்டாம்" - முன்னாள் அமைச்சர் ஜெயக்குமார்!

AIADMK Meeting Ex Minister Jayakumar: அதிமுக 40 சட்டமன்ற உறுப்பினர்கள் திமுகவுக்கு வர இருந்ததாகச் சட்டப்பேரவை சபாநாயகர் அப்பாவு பேசிய விவகாரம், சபாநாயகர் அமைச்சராக வேண்டும் என்பது அவர் ஆசை, அப்பாவு பேசியதில் கிஞ்சித்தும் ஒரு சதவீதம் கூட உண்மை இல்லை முன்னாள் அமைச்சர் ஜெயக்குமார் பேட்டியளித்துள்ளார்.

சென்னை:சென்னை - நாடாளுமன்றத் தேர்தலை எதிர்கொள்ள அனைத்து கட்சிகளும் தங்களைத் தயார்ப்படுத்திக் கொண்டு வரக்கூடிய நிலையில் அதிமுகவும் தனது பணியைத் தொடங்கி இருக்கிறது. அந்த வகையில் அதிமுக பொதுச் செயலாளர் எடப்பாடி பழனிச்சாமி தலைமையில் அதிமுகவின் பூத் கமிட்டி, இளைஞர் பாசறை, இளம் பெண்கள் பாசறை மற்றும் மகளிர் அமைப்புகளை ஏற்படுத்துவதற்கான களப்பணி குறித்து மாவட்ட பொறுப்பாளர்கள், மாவட்ட கழக செயலாளர் கூட்டம் இன்று (நவ.21) அதிமுக தலைமைக் கழகத்தில் உள்ள எம்ஜிஆர் மாளிகையில் நடைபெற்றது.

ஆலோசனைக்குப் பின் செய்தியாளர்களைச் சந்தித்துப் பேசிய முன்னாள் அமைச்சர் ஜெயக்குமார் கூறும் போது, "ஒரு நாள் போவார் ஒரு நாள் வருவார் என்ற படகோட்டி திரைப்படப் பாடல் உள்ளது. ஒவ்வொரு நாளும் துயரம் என அறிந்தே அன்றே அதிமுக ஆட்சிக் காலத்தில் பல்வேறு திட்டங்கள் பொருளாதார அடிப்படையில் கொண்டு வரப்பட்டது. ஆனால், தற்போது திமுக ஆட்சியில் ஒரு திட்டம் கூட மீனவர்களுக்குக் கொண்டு வரவில்லை என்றார். தற்போது, மீனவர்களுக்கு ஒதுக்கப்படும் நிதி மிகக் குறைவு. அதிமுக ஆட்சிக் காலத்தில் அதிக நிதி கொடுக்கப்பட்டது. இப்போது மீனவர்கள் வஞ்சிக்கப்படுகிறார்கள்.

அந்நிய நாட்டவர்களால் தமிழக மீனவர்களைக் கைது செய்துள்ளது என அறிந்த அரசு என்ன நடவடிக்கை எடுத்துள்ளது. ஒரு கடிதம் எழுதினால் மட்டும் போதுமா உடனே நடவடிக்கை எடுத்துவிட வேண்டாமா எனக் கேள்வி எழுப்பினார்.

மக்களுக்கு திமுக அரசு மேல் கடுமையான அதிருப்தி உள்ளனர். தேர்தல் வாக்குறுதி நிறைவேற்றப்படவில்லை. விலை வாசி உயர்வு, மின்சார கட்டண உயர்வு அனைத்து பிரச்சாரத்தில் பேசப்படும். தேர்தல் வாக்குறுதியை நிறைவேற்றியதாகச் சொன்னால் தமிழ்நாட்டு மக்கள் நம்ப மாட்டார்கள். எவ்வளவு திட்டங்களைச் செயல்படுத்துவோம் என தி.மு.க தேர்தல் வாக்குறுதியில் கூறினார்கள். வருகின்ற நாடாளுமன்றத் தேர்தல் பிரச்சாரத்தின் போது எங்கள் ஆட்சிக் காலத்தில் கொண்டுவரப்பட எத்தனையோ திட்டங்களைச் சொல்லிப் பேசுவோம்.

திமுக ஆட்சியில் இருக்கும் கடுமையான எதிர்ப்பு அலைகள் இருக்கும் நிலையில் எங்கள் ஆட்சியில் கொண்டு வரப்பட்ட திட்டங்களை நினைவில் கொண்டு கண்டிப்பாக மக்கள் எங்களுக்கு வாக்கு அளிப்பார்கள். இன்று நடைபெற்ற ஆலோசனை என்பது கட்சியைப் பலப்படுத்துவது தொடர்பாக மட்டும் தானே தவிர வேறு ஏதும் கலந்து ஆலோசிக்கப்படவில்லை. மாநில அரசு என்றாலும், மத்திய அரசு என்றாலும் மக்கள் விரோத போக்காகச் செயல்பட்டு இருந்தால் அது பற்றியும் பிரச்சாரத்தில் கட்டாயமாகப் பேசுவோம்." எனத் தெரிவித்தார்.

முன்னாள் அமைச்சர்கள் மீதான ஊழல் குற்றச்சாட்டுக்கள் விசாரிக்க ஆளுநர் ஒப்புதல் அளித்தது குறித்த கேள்விக்கு, "நீதிமன்றம் உள்ளது அதன் மூலம் நிரபராதி யார் என்று நிரூபிப்போம். மக்கள் தான் இங்கு எஜமானர்கள் அவர்களுக்கு நடப்பவை அனைத்தும் தெரியும்.

முதலமைச்சருக்கு நாட்டு மக்கள் குறித்து கவலை உள்ளதா? பல்வேறு மாவட்டங்களில் பெருமழை பெய்து வருகிறது. ஆனால், சென்னையில் அதிகளவு மழை கிடையாது குறைவாகப் பெய்த மழைக்கே இங்குக் குளம் போலத் தண்ணீர் தேங்கி நிற்கிறது. தொடர்ந்து, மழை பெய்து வரும் நிலையில் தண்ணீர் தேங்கி மக்கள் அவதிப் பட்டு வருகிறார்கள். அவற்றிற்கு எந்தவித நடவடிக்கையும் இல்லை. மேலும், மக்களுக்குத் தேவையான மருந்துகள் மருத்துவமனைகளில் இல்லை அது குறித்து இதுவரை எந்தவித பதிலும் அரசு கூறவில்லை.

மேலும், தி.மு.கவில் கூட்டணியில் பல்வேறு முரண்பாடுகள் நிலவி வருகிறது. அதிமுக கூட்டணியில் யார்? யார்? உள்ளார்கள் என அனைவருக்கும் கட்டாயம் தெரிவிக்கப்படும். 'ஆடு நனைகிறது என்று ஓநாய் அழுக வேண்டாம்' முதல்வர் பேசுவது அப்படிதான் உள்ளது. பொது மேடைகளில் மற்றும் சட்டப் பேரவையில் ஜெயலலிதா குறித்து தரக்குறைவாகப் பேச வேண்டியது. சென்னை அடையாறு உள்ள இசை கவின் கலை பல்கலைக்கழக துணை வேந்தராக முதலமைச்சர் இருக்க வேண்டும் என்று அப்போது முன்னாள் முதலமைச்சர் ஜெயலலிதா சொன்ன போது ஏன் எதிர்த்தீர்கள்? நீங்கள் இப்படிப் பேசுவதால் அதிமுக தொண்டன் உங்களுக்கு வாக்களித்து விடுவானா என்ன?நடப்பதை எல்லாம் அறிந்தவன் தான் அதிமுக தொண்டன் எனக் கூறினார்.

நேற்று எதிர்க்கட்சியாக இருந்த போது ஒரு நிலைப்பாடு இப்போது ஆளும் கட்சியாக வந்தவுடன் ஒரு நிலைப்பாடு இவை எல்லாவற்றையும் அறிந்தவர்கள்தான் அதிமுக தொண்டர்கள். சபாநாயகருக்கு அமைச்சராக வேண்டும் என்பது ஆசை பாவம், ஸ்டாலினுக்கு ஒரு வேண்டுகோள் வைக்கிறேன் அப்பாவுவை அமைச்சராக்கிவிடுங்கள். அதற்காகத் தான் அவர் குரைத்துக் கொண்டே இருக்கிறார். நான் என்ன சொல்கிறேன் என்றால் இது போலக் கம்பி கட்டும் கதைகள் எல்லாம் சொல்ல வேண்டாம். ஸ்டாலின் தன்னை அமைச்சராக்கி விடுவார் என்ற எண்ணத்தில் சபாநாயகர் முதலமைச்சருக்குத் துதி பாடுகின்ற நிலை தற்போது ஏற்பட்டிருக்கிறது." எனக் கூறினார்.

இதையும் படிங்க:"ஆளுங்கட்சியாக இருந்தும் மக்களுக்கு எதுவும் செய்ய முடியவில்லை" - நெல்லை மேயருக்கு எதிராக திமுக கவுன்சிலர்கள் தர்ணா!