ஆகஸ்ட் முதல் கல்லூரிகளில் மாணவர் சேர்க்கை - அமைச்சர் பொன்முடி

பிளஸ் 2 தேர்வு முடிவுகள் வெளிவருவதற்கு முன்னர் கல்லூரிகளில் மாணவர் சேர்க்கை நடத்தினால் கடும் நடவடிக்கை எடுக்கப்படும் என்று உயர் கல்வித்துறை அமைச்சர் பொன்முடி எச்சரிக்கை விடுத்துள்ளார்.

கல்லூரியில் மாணவர்கள் சேர்க்கை தொடர்பாக முதலமைச்சர் ஸ்டாலின் தலைமையில் உயர் கல்வித்துறை அமைச்சர் பொன்முடி, உயர் கல்வித்துறைச் செயலாளர் கார்த்திகேயன் மற்றும் அரசு உயர் அலுவலர்களின் ஆலோசனைக் கூட்டம் நடைபெற்றது.

சென்னை தலைமைச் செயலகத்தில் செய்தியாளர்களுக்குப் பேட்டி அளித்த உயர் கல்வித்துறை அமைச்சர் பொன்முடி, தமிழ்நாடு முதலமைச்சர் ஸ்டாலின் தலைமையில் கல்லூரிகளில் மாணவர் சேர்க்கை குறித்து கலந்தாய்வுக் கூட்டம் நடைபெற்றதாகத் தெரிவித்தார். சிபிஎஸ்இ +2 தேர்வு முடிவுகள் ஜூலை 31ஆம் தேதி வெளியாக உள்ள நிலையில், அப்போதுதான் மதிப்பெண் பட்டியலும் வெளிவரும் எனத் தெரிவித்தார்.

+2 ரிசல்ட்டுக்குப் பின் மாணவர் சேர்க்கை

அதேபோல தமிழ்நாட்டிலும் +2 தேர்வு முடிவுகள் ஜூலை 31ஆம் தேதி வெளியாகிறது. எனவே தேர்வு முடிவுகள் வெளியான பின்னர், அரசு மற்றும் அரசு உதவி பெறும் கல்லூரிகள் மற்றும் தனியார் கல்லூரிகளில் மாணவர் சேர்க்கை நடைபெறும் எனக் கூறினார்.

மேலும் தேர்வு முடிவுகள் வெளியாவதற்கு முன்னதாக நுழைவுத்தேர்வு வழியாகவோ அல்லது வேறு எந்த வகையிலும் தனியார் கல்லூரிகளில் மாணவர் சேர்க்கை நடத்தினால் அது செல்லாது எனவும்; அவை ஏற்கப்படமாட்டாது எனவும் தெரிவித்தார். அவ்வாறு நடந்தால் அந்த கல்லூரிகள் மீது உரிய நடவடிக்கை எடுக்கப்படும் எனவும் கூறினார்.

மேலும் தற்போது பாலிடெக்னிக் கல்லூரிகளில் ஒன்பதாம் வகுப்பு மதிப்பெண் அடிப்படையில் மாணவர் சேர்க்கை நடைபெற்று வருவதாகவும் அவர் தெரிவித்தார்.

நீட் அனுமதியில்லை

அண்ணா பல்கலைக்கழக மாணவர் சேர்க்கையில் எந்தவித விதியும் திருத்தப்படவில்லை எனவும்; வழக்கம்போல் மாணவர் சேர்க்கைகள் பிளஸ் 2 தேர்வு முடிவுகள் வெளியான பின்னர் நடைபெறும் எனவும் கூறினார்.

தற்போது கரோனா என்பதால் கல்லூரிகளுக்கு வகுப்புகள் ஆகஸ்ட் மாதத்தில் தொடங்க வாய்ப்பு இருப்பதாகவும் தமிழ்நாட்டில் நீட் தேர்வுக்கு அனுமதிக்கக் கூடாது என்பது தான் அரசின் நிலைப்பாடு எனவும் அதற்கான அனைத்து நடவடிக்கைகளையும் தமிழ்நாடு அரசு மேற்கொண்டு வருவதாகவும் தெரிவித்தார்.