சென்னை: நடிகை மீரா மிதுன் பட்டியலினத்தவர் குறித்து அவதூறாகப் பேசி சமூக வலைதளத்தில் காணொலி ஒன்றை வெளியிட்டார். இது தொடர்பாக அவர் மீது விடுதலைச் சிறுத்தைகள் கட்சி உள்ளிட்ட பல்வேறு அமைப்புகள் காவல் துறையில் புகார் அளித்தன.
இந்தப் புகாரின் அடிப்படையில் வன்கொடுமைத் தடுப்புச் சட்டம், கலகத்தைத் தூண்டுதல் உள்ளிட்ட ஏழு பிரிவுகளின்கீழ் காவல் துறையினர் வழக்குப்பதிவு செய்தனர். கடந்த 11ஆம் தேதி மத்திய குற்றப் பிரிவு அலுவலகத்தில் முன்னிலையாகும்படி மீரா மிதுனுக்கு அழைப்பாணை அனுப்பப்பட்டது.
தயாரிப்பாளர்களுக்கு இழப்பு
விசாரணைக்கு முன்னிலையாகாமல் கேரளாவில் தலைமறைவாக இருந்த மீரா மிதுன், அவரது நண்பர் சாம் அபிஷேக், கடந்த 14ஆம் தேதி கைது செய்யப்பட்டனர். புழல் சிறையில் அடைக்கப்பட்டுள்ள மீரா மிதுன், அவரது நண்பர் சாம் அபிஷேக் தங்களுக்கு பிணை வழங்கக் கோரி சென்னை முதன்மை அமர்வு நீதிமன்றத்தில் மனு தாக்கல் செய்திருந்தனர்.
அதில், தன்னைப் பற்றி அவதூறாகச் செய்தி பரப்பியதால் ஏற்பட்ட மன உளைச்சலால், கண்டனம் தெரிவிக்கும் வகையில் பேசியபோது, வாய்த் தவறி பட்டியலின சமுதாயத்தைப் பற்றி பேசியதாகவும், பிறகு தான் பேசியது தவறு எனத் தெரிந்ததும், தான் பேசியது தவறு எனத் தான் குறிப்பிட்டதாகவும் மீரா மிதுன் தெரிவித்துள்ளார்.