சென்னை: எழும்பூரில் உள்ள அரசு அருங்காட்சியகத்தில் ஆதிச்சநல்லூர் மற்றும் கீழடி அகழாய்வு மாதிரிகள் கண்காட்சி தொடங்கப்பட்டுள்ளது.
பண்டைத் தமிழர்களின் நாகரிகம், வீரம், தமிழ் வளர்ச்சி உள்ளிட்டவற்றை ஆராய்ந்து கண்டுபிடிக்க ஆதிச்சநல்லூர் மற்றும் கீழடியில் அகழாய்வு நடத்தப்படுகிறது. கிடைத்தற்கரிய பொக்கிஷங்கள் கண்டெடுக்கப்பட்டன. இந்நிலையில் அகழாய்வின்போது தோண்டி எடுக்கப்பட்ட பொருட்கள் இந்தக் கண்காட்சியில் வைக்கப்பட்டுள்ளன.
ஆதிச்சநல்லூரிலிருந்து எடுக்கப்பட்ட சுடுமண் தாழிகள் காட்சிப்படுத்தப்பட்டுள்ளன. இந்த தாழியில் மனித எலும்புகளின் எச்சங்கள், பலவகை சுடுமண் கொள்கலன்கள் இருந்தன. அந்த கொள்கலன்களின் உள்ளே இரும்பு, வெண்கலம் ஆகியவற்றால் செய்யப்பட்ட பொருட்கள் பல இருந்தன.
ஆதிச்சநல்லூர் அகழாய்வு
அகழாய்வில் கிடைக்கப்பட்ட பொருட்கள் 3000 ஆண்டுகள் பழமையானவையாக இருக்கக்கூடும் எனக் கருதி விரிவான ஆராய்ச்சிக்குப் பின், அது உறுதிபடுத்தப்பட்டுள்ளது.
இதன் மூலம் தமிழர்கள் பல ஆண்டுகளாக வழி வழியாக பூமியில் வாழ்ந்து வருகிறார்கள் எனத் தெரிகிறது. பல ஆண்டுகளுக்கு முன்பே தமிழ் நாகரிகம் பிறந்துள்ளது. தாமிரபரணி ஆற்றின் கரையோரம் ஆதிச்சநல்லூர் அமைந்துள்ளது. இது தாமிரபரணி ஆற்றங்கரை நாகரிகம் எனவும் அழைக்கப்படுகிறது. ஆற்றங்கரையோரம் இருப்பதால் அங்கு விவசாயம் செழித்திருக்கக் கூடும் எனவும் வல்லுநர்கள் கருதுகின்றனர்.
1900களில் தொல்லியல் வல்லுநர் அலெக்ஸாண்டர் ரியாவால் ஆதிச்சநல்லூரில் அகழ்வாராய்ச்சி மேற்கொண்டு கண்டெடுக்கப்பட்ட தனித்துவமானப் பொருட்களும் இங்கு வைக்கப்பட்டுள்ளன.
2600 ஆண்டுகள் பழமையான கீழடிப் பொருட்கள்
தமிழ்நாட்டின் சிவகங்கை மாவட்டத்தில் கீழடி அமைந்துள்ளது. கீழடியில் இதுவரை ஏழு கட்ட அகழாய்வுப் பணிகள் நடந்துள்ளன. இதில், அங்கு தொழிற்சாலைகள், மக்கள் நகர்ப்புற வாழ்வு வாழ்ந்ததற்கான அடையாளங்கள் கண்டெடுக்கப்பட்டன.
தொழிற்சாலைகளின் எச்சங்கள், வீடுகளின் பொருட்கள், சுடுமண் கொள்கலன்கள், அணிகலன்கள், உலோக கருவிகள், முதுமக்கள் தாழி என ஐந்தாயிரம் பொருட்கள் கண்டெடுக்கப்பட்டன. இப்பொருட்கள் சுமார் 2600 ஆண்டுகள் பழமையானவை என ஆராய்ச்சி முடிவுகள் சொல்கின்றன. கீழடியில், ஒரு சங்ககால தமிழ் நாகரிகம் இருந்ததாகவும் கூறப்படுகிறது. கீழடியில் கண்டெடுக்கப்பட்ட பொருட்கள் இங்கு காட்சிபடுத்தப்பட்டுள்ளன.
கீழடி, வைகை ஆற்றின் கரையில் அமைந்துள்ளது. இது வைகை நாகரிகம் என்று அழைக்கப்படுகிறது. நகர்ப்புற திட்டமிடல் மிகவும் வளர்ச்சியடைந்த நிலையில் இருந்த இந்த இடத்தில், மண்பாண்டங்கள் செய்தல், உலோக வேலை செய்தல், கால்நடை வளர்ப்பு, விவசாயம், நெசவுத் தொழில்கள் செழித்திருந்தன என கண்டுபிடிக்கப்பட்டுள்ளது.
கீழடி அகழாய்வு மாதிரிகள்
அதுமட்டுமில்லாமல் கீழடியில் அகழ்வாராயப்பட்ட சுடுமண் உறைகிணறுகள், மழைநீர் வடிகாலாக செயல்படுத்தப்பட்ட பள்ளங்கள், இரட்டைத் துளைகளைக் கொண்ட கூரை ஓடுகள் போன்றவற்றின் மாதிரிகளும் இந்தக் கண்காட்சியில் இடம் பெற்றுள்ளன. இவை கீழடியில் உள்ளது போல் தத்ரூபமாக வடிவமைக்கப்பட்டுள்ளது.
இதுகுறித்து நம்மிடம் பேசிய கல்லூரி மாணவர் சித்தார்த், "கீழடி அகழாய்வில் கண்டெடுக்கப்பட்ட பொருட்களை புகைப்படமாக மட்டுமே பார்த்து வந்தோம். நேரடியாக பார்க்கவில்லை. தமிழ்நாடு அரசின் முயற்சியால் இங்கு அந்த பொருட்கள் கொண்டு வந்து கண்காட்சியாக வைக்கப்பட்டுள்ளன.
இது என்னைப் போன்று வரலாற்றுப் பாடம் படிக்கும் மாணவர்களுக்கு உதவியாக இருக்கும். வரலாற்றை திரும்பிப் பார்க்க வாய்ப்பாக உள்ளது. உண்மையான வரலாற்றைத் தெரிந்து கொள்ள முடிகிறது" என்றார்.
இந்த கண்காட்சியில் அகழாய்வுப் பொருட்கள் மட்டும் இல்லாமல் இந்திய விடுதலைப் போராட்டத்தில் ஈடுபட்ட விடுதலை வீரர்களின் புகைப்படங்கள், தமிழ்நாட்டைச் சேர்ந்த வீரர்கள் புகைப்படங்கள், அவர்கள் பயன்படுத்திய ஆயுதங்கள், புத்தகங்கள் என 165 பொருட்கள் காட்சிப்படுத்தப்பட்டுள்ளன. ஆங்கிலேயர்களுக்கு எதிராகப் போராடி விடுதலை போரில் பங்குபெற்ற தமிழ்நாடு வீரர்கள் குறித்த விவரங்களும் இடம்பெற்றுள்ளன.