சென்னை:தமிழ் திரையுலகின் முன்னணி நடிகரும், தென்னிந்திய நடிகர் சங்கத் தலைவருமாக இருக்கக்கூடியவர் நாசர். இவர் தமிழ் திரைப்படங்களில் மட்டுமல்லாமல், மலையாளம், தெலுங்கு, கன்னடம், பெங்காலி, இந்தி போன்ற பிற மொழி படங்களிலும் நடித்துள்ளார். குறிப்பாக இவர் நடிக்கும் கதாபாத்திரங்கள் ஒவ்வொன்றும் ரசிகர்களின் மனதில் நீங்காமல் நிலைத்து நிற்கும்.
மேலும் இவர் இயக்குநர், தயாரிப்பாளர் என பன்முகத் தன்மை கொண்டிருந்தாலும், இவர் ரசிகர்கள் மனதில் நின்றது இவரது நடிப்பினால் தான். நடிக்கும் கதாபாத்திரமாகவே வாழக்கூடிய திறமை வாய்ந்த சிறந்த நடிகர் நாசர். இவர், சில படங்களில் வில்லனாகவும், சில படங்களில் நகைச்சுவை நாயகனாகவும் கலக்கி இருப்பார். குறிப்பாக பெரும்பாலான கமலஹாசன் நடிக்கும் அல்லது இயக்கும் திரைப்படங்களில் நடிகர் நாசரின் கதாபாத்திரங்கள் சிறப்பு வாய்ந்ததாக இருக்கும்.
கிட்டத்தட்ட ஐந்நூறு படங்களுக்கு மேலாக நடித்திருக்கும் நடிகர் நாசர், திரையுலகின் முக்கிய திரைப்படங்களாகக் கருதப்படும் படங்களில் இவரது பங்கு இல்லாமல் இருக்காது. இவர் தேர்ந்தெடுத்து நடிக்கும் கதாபாத்திரம் வேறு யாருக்கும் பொருந்தாதவாறு இவரது நடிப்பு அமைந்திருக்கும். சில தினங்களுக்கு முன்னதாக வெளியான "800" படத்திலும் அவர் நடித்துள்ளார்.