Parliament Election 2024: வாக்குச்சாவடி பொறுப்பாளர்களுக்கு பயிற்சி பாசறை! திமுகவில் சூடு பறக்கும் தேர்தல் பணி

நாடாளுமன்ற தேர்தலை சந்திக்க மாநிலம் முழுவதும் திமுக 5 மண்டலங்களாக பிரிக்கப்பட்டு, மண்டலம் வாரியாக வாக்குச்சாவடி பொறுப்பாளர்களுக்கு ஒரு நாள் பயிற்சி பாசறை கூட்டம் நடத்த முடிவு செய்யப்பட்டுள்ளது. அதன்படி, இந்த கூட்டம் திருச்சியில் முதல் முறையாக நடத்தப்படவுள்ளது.

சென்னை: வரும் 2024ஆம் ஆண்டு நாடாளுமன்ற தேர்தல் (Parliament Election 2024) நடைபெற உள்ள நிலையில் தமிழ்நாட்டில் அரசியல் கட்சிகள் தங்களது தேர்தல் வியூகங்களை வகுத்து வருகிறது. அந்த வகையில் ஆளும் திமுக முதன் முறையாக வாக்குச்சாவடி பொறுப்பாளர்களுக்கு பயிற்சி கொடுக்க உள்ளது. இதற்கான பயிற்சி பாசறைக்கூட்டம் நாளை மறுநாள் (ஜூலை 26) திருச்சியில் திமுக தலைவரும் முதலமைச்சருமான மு.க.ஸ்டாலின் தலைமையில் நடக்கிறது.

நேற்றைய தினம் (ஜூலை 23) ஸ்டாலின் திமுக தொண்டர்களுக்கு எழுதிய கடிதத்தில், “மக்களவை தேர்தலை முன்னிட்டு, சமூக வலைதளங்களில் அரசியல் எதிரிகளின் பொய்ப் பிரசாரங்களை தடுக்கவும், தெரு முனை மற்றும் வீட்டு வாசல் கூட்டங்கள் மூலம் வாக்காளர்களை சந்திக்கவும், திமுக பூத் ஏஜெண்டுகளுக்கு வேண்டுகோள் விடுத்துள்ளார். மேலும் மாநிலம் முழுவதும் உள்ள பூத் ஏஜெண்டுகளுக்கு இந்த பயிலரங்குகள் ஏற்பாடு செய்யப்பட்டு, ஆன்லைனிலும், ஆஃப்லைனிலும் எதிர்க்கட்சிகளின் பிரச்சாரங்களை எதிர்கொள்வது குறித்து பயிற்சி அளிக்கப்படும்” என குறிப்பிட்டுள்ளார்.

மேலும், நாளை மறுநாள் மத்திய மாவட்டங்களைச் சேர்ந்த பூத் கமிட்டி முகவர்களுக்கான முதல் பயிற்சிக் கூட்டம் திருச்சியில் நடைபெறுகிறது. திமுக மாநிலத்தில் உள்ள அனைத்து பூத்களுக்கும் பொறுப்பாளர்களை நியமித்து, பூத் கமிட்டிகளை அமைத்தது. அனைத்து பூத் ஏஜெண்டுகளின் கூட்டத்தை ஒரே கூட்டமாக நடத்தாமல், பயிலரங்குகள் எப்போது நடைபெறும் என்பதை மண்டல அளவிலான கூட்டங்களை நடத்த திமுக முடிவு செய்துள்ளது.

திருச்சியில் நடைபெறும் முதல் பயிலரங்கில், திமுகவின் 15 மாவட்டங்களைச் சேர்ந்த 12ஆயிரத்திற்கும் மேற்பட்ட பூத் முகவர்கள் பங்கேற்கின்றனர். கடந்த அதிமுக ஆட்சியில் திமுக வாக்காளர்களின் பெயர்களை நீக்கிவிட்டு போலி வாக்காளர்களை வைத்து வாக்காளர் பட்டியலை அதிகப்படுத்தியதாக குற்றச்சாட்டுகள் எழுந்துள்ள நிலையில் வரும் தேர்தலில் பூத் கமிட்டி உறுப்பினர்களின் பங்கு மிக முக்கியமானது என்று ஸ்டாலின் கூறினார். இறந்த வாக்காளர்களின் பெயர்களை வாக்காளர் பட்டியலில் இருந்து நீக்குவது, புதிய வாக்காளர்களைச் சேர்ப்பது போன்றே முக்கியமானது என கடிதத்தில் கூறியிருந்தார்.

மேலும் இந்த பயிற்சி பாசறைக்கூட்டம் டெல்டா மண்டலத்துக்குட்பட்ட அரியலூர், பெரம்பலூர், கடலூர் கிழக்கு, கடலூர் மேற்கு, மயிலாடுதுறை, நாகை, திருவாரூர், தஞ்சாவூர் மத்தியம், தஞ்சை தெற்கு, திருச்சி மத்தியம், திருச்சி தெற்கு திருச்சி வடக்கு, புதுக்கோட்டை தெற்கு, வடக்கு ஆகிய 15 மாவட்டங்களின் தி.மு.க. மாவட்ட செயலாளர்கள் மாவட்டங்களின் வாக்குச்சாவடி பொறுப்பாளர்கள் கலந்து கொள்கின்றனர்.

இதற்காக முதலமைச்சர் ஸ்டாலின் தேர்தல் வியூகம் குறித்து தொடர்ந்து கட்சியின் மூத்த நிர்வாகிகளுடன் ஆலோசனை நடத்தி வரும் நிலையில், இதன் முதல் முயற்சியாக நாளை மறுநாள் திருச்சிக்கு வருகிறார். மேலும் ஸ்டாலின் இரண்டு நாள் திருச்சியில் முகாமிட்டு கட்சி மற்றும் அரசு நிகழ்ச்சிகளில் பங்கேற்கிறார். இந்த பயிலரங்கின் போது மூத்த தலைவர்கள் மட்டுமின்றி திமுக பொதுச்செயலாளர் துரைமுருகன், ஸ்டாலின் ஆகியோர் பூத் ஏஜெண்டுகளிடம் பேசுவார்கள் என தகவல் வெளியாகி உள்ளது.

பூத் அளவில் ஒரு கட்சியின் வெற்றியை உறுதி செய்வது பூத் ஏஜெண்டுகளின் கடமை என்று ஏற்கனவே ஸ்டாலின் கூறிய நிலையில் முகவர்களை கூர்மைப்படுத்தும் வகையில் பயிலரங்குகள் ஏற்பாடு செய்யப்பட்டுள்ளன என கட்சி வட்டாரங்கள் தெரிவித்துள்ளன. மேலும் இந்த பயிற்சி பட்டறைக்குப் பிறகு அவர்களின் வட்டாரங்களில் தெரு முனை மற்றும் கதவு படி பிரச்சாரங்களைத் தொடங்குமாறு கேட்டுக் கொள்ளப்படுவார்கள் என தெரிவிக்கப்பட்டுள்ளது.

இது குறித்து திமுகவின் அமைப்பு செயலாளர் ஆர்.எஸ் பாரதி தொலைபேசி வாயிலாக நம்மிடம் கூறுகையில், இந்த பயிற்சி திமுகவால் முதன் முறை நடத்தப்படுகிறது என்பதை ஒப்புக்கொண்டார். தொடர்ந்து பேசிய அவர், "தேர்தல்கள் நெருங்கும் போது அரசியல் கட்சிகள் பல வியூகங்களை வகுக்கும். அந்த வகையில் திமுக இந்த பயிற்சியை பூத் ஏஜெண்டுகளுக்கு கொடுக்க ஏற்கனவே முடிவு செய்தது" என தெரிவித்தார். இந்த வியூகம் எதிக்கட்சியினால் எடுக்கப்பட்டதா என்ற கேள்விக்கு, "திமுக எந்த எதிர்க்கட்சிக்கும் பயந்த கட்சியில்லை" என தெரிவித்தார்.

இதையும் படிங்க:அண்ணாமலை யாத்திரை ஃபேக் - விமர்சித்த முன்னாள் ஐஏஎஸ் அதிகாரி சசிகாந்த்!