கழிவறையில் பெண்களை வீடியோ எடுத்த ஊழியர் கைது.. சென்னையில் பகீர் சம்பவம்!

சென்னையில் தனியார் நிறுவனம் ஒன்றில் பெண்கள் கழிவறைக்கு செல்வதை மறைந்திருந்து வீடியோ எடுத்த தற்காலிக ஊழியர் கைது செய்யப்பட்டார்.

சென்னை: வளசரவாக்கம் அடுத்த ராமபுரம் பகுதியில் தனியாருக்குச் சொந்தமான கார் சர்வீஸ் செய்யும் நிறுவனம் செயல்பட்டு வருகிறது. இங்கு ஏராளமான ஊழியர்கள் பணிபுரிந்து வருகின்றனர். இந்நிலையில் இங்கு பணிபுரியும் பெண் ஊழியர்கள் கழிவறைக்குச் சென்ற போது அருகில் இருக்கும் மர்ம நபர் ஒருவர் செல்போனில் வீடியோ பதிவு செய்ததைக் கண்டு அதிர்ச்சி அடைந்தனர்.

இந்த சம்பவம் குறித்து நிறுவன மேலாளரிடம் கூறியதையடுத்து, அங்குச் சென்று பார்த்த போது நபர் ஒருவர் கழிவறையிலிருந்து தப்பி ஓடினர். அப்போது அவர் அங்குத் தற்காலிக ஊழியராகப் பணி புரியும் பூந்தமல்லி, மேல்மா நகரைச் சேர்ந்த தமிழரசன் என்கிற ஆகாஷ் (23) எனத் தெரியவந்தது. பின்னர், அவரை மடக்கி பிடித்து விசாரணை செய்த போது அவர் முன்னுக்கு பின் முரனாக பதிலளித்துள்ளார்.

அதில் சந்தேகப்பட்டு அவரிடம் இருந்த செல்போனை வாங்கி சோதனை செய்து பார்த்த போது, கழிவறைக்குச் செல்லும் பெண்களைப் படம் பிடித்து வைத்திருந்தது தெரியவந்தது. மேலும் இச்சம்பவம் குறித்து ராமாபுரம் காவல்நிலையத்தில் புகார் அளித்தனர். அந்த புகாரின் பேரில் ராமாபுரம் போலீசார் தமிழரசனை கைது செய்து செல்போனை பறிமுதல் செய்து விசாரணை செய்தனர். அதன் பின் அந்த நபரின் செல்போனில் இருந்த விடியோவை கொண்டு அவர் மீது வழக்குப் பதிவு செய்து சிறையில் அடைத்தனர்.