பொதுமக்களிடம் லட்ச கணக்கில் மோசடி - நிதி நிறுவன உரிமையாளர் வீடு முற்றுகை

கவர்ச்சியான விளம்பரம் மூலம் அதிக லாபம் வழங்குவதாக பொதுமக்களை ஏமாற்றி பல லட்சம் ரூபாயை வசூல் செய்து தலைமறைவான நிதி நிறுவன உரிமையாளரின் வீட்டை நள்ளிரவில் பாதிக்கப்பட்டவர்கள் முற்றுகையிட்டனர்.

சென்னை: கோடம்பாக்கம் ஆற்காடு சாலையில் விநாயகா எண்டர்பிரைசஸ் எனும் நிதி நிறுவனம் இயங்கி வருகிறது. இங்கு பல்வேறு கவர்ச்சிகரமான சலுகைகள் இலவசங்கள் அடங்கிய துண்டு பிரசூரங்களை விநியோகம் செய்து பொதுமக்களை 50 ஆயிரம் ரூபாய் முதல் லட்ச கணக்கில் முதலீடு செய்ய வைத்து ஆயிரத்திற்கும் மேற்பட்டோரிடம் ஏமாற்றியதாக கூறப்படுகின்றது.

நிறுவனர், உரிமையாளர் எனக் கூறப்படும் வசந்த் மற்றும் அர்ஜுன் ஆகியோரை முதலீடு செய்தவர்கள் கடந்த சில தினங்களாக தொடர்பு கொண்டபோது இருவரது கைபேசியும் அனைத்து வைக்கப்பட்டிருந்ததை கண்டு அதிர்ச்சியடைந்தனர். கோடம்பாக்கத்தில் உள்ள அலுவலகத்திற்கு சென்றும் பிரயோஜனம் இல்லை. இறுதியாக உரிமையாளரின் இல்லம் அயப்பாக்கத்தில் இருப்பதை அறிந்து நள்ளிரவில் சென்றால் பிடித்து விடலாம் என எண்ணி அவரது வீட்டை சுற்றி வளைத்தனர்.

ஆனால் வீடு பூட்டி இருந்ததால் அனைவரும் ஏமாற்றம் அடைந்தனர். இதனால் ஆத்திரமடைந்தவர்கள் வீட்டை முற்றுகையிட்டு ஆர்ப்பாட்டத்தில் ஈடுபட்டுள்ளனர். தகவலறிந்து சம்பவ இடத்திற்கு வந்த காவல் துறையினர் ஆர்ப்பாட்டத்தில் ஈடுபட்டவர்களிடம் புகார் அளிக்குமாறும் அதன் அடிப்படையில் நடவடிக்கை எடுக்கப்படும் எனவும் உறுதி அளித்தனர். இதையடுத்து அவர்கள் கலைந்து சென்றனர். கவர்ச்சிகரமான விளம்பரம் மூலம் ஆயிரத்துக்கும் மேற்பட்ட பொதுமக்களை ஏமாற்றியவரின் வீட்டை முற்றுகையிட்டது பெரும் பரபரப்பை ஏற்படுத்தி உள்ளது.

இதையும் படிங்க:ஒரு கோடி ரூபாய் கேட்டு 4 வயது சிறுவன் கடத்தல் - சுற்றிவளைத்து பிடித்த போலீஸ்!