ஊரடங்கு உத்தரவால் சென்னையில் காற்று மாசு குறைவு!

சென்னை: தமிழகத்தில் அமல்படுத்தப்பட்ட ஊரடங்கு உத்தரவால் மாநில தலைநகரான சென்னையில் காற்று மாசு குறைந்துள்ளது.

சென்னையில் ஊரடங்கு உத்தரவு காரணமாக மக்கள் வீட்டிலேயேத் தங்கியிருக்கின்றனர். வாகனங்கள் தொழிற்சாலைகள் முற்றிலும் இயங்கவில்லை. இதன் காரணமாக, காற்று மாசு மிகவும் குறைந்துள்ளது. கரோனா வைரஸ் தொற்று தமிழ்நாட்டிலும் தற்போது வேகமாகப் பரவிவருவதால், பாதிக்கப்பட்டவர்கள் சிகிச்சைக்காக மருத்துவமனையில் அனுமதிக்கப்பட்டுள்ளனர்.

ஏற்கனவே இதனைக் கட்டுப்படுத்தும் விதமாக தமிழ்நாடு அரசு சுகாதாரத் துறை பல்வேறு நடவடிக்கைகளை மேற்கொண்டு வருகிறது. அதன் ஒரு பகுதியாக, வரும் ஏப்ரல் 14ஆம் தேதி வரை ஊரடங்கு உத்தரவு பிறப்பிக்கப்பட்டுள்ளது. இதனால் பள்ளி, கல்லூரி, பொழுதுபோக்கு பூங்கா, வணிக வளாகம், திரையரங்குகள், தனியார் நிறுவனங்கள் போன்றவை மூடப்பட்டுள்ளன. வெளியில் வருவதற்குத் தடை விதிக்கப்பட்டுளதால், பொதுமக்கள் வெளியில் வருவதில்லை.

முன்னதாக சென்னையில் தினந்தோறும் 30 லட்சம் வாகனங்கள் இயக்கப்பட்டுவந்தன. தற்போது இந்த வாகன இயக்கமும் முழுவதுமாக குறைந்துள்ளது. ஒருசிலர் மட்டுமே தேவைகளுக்காக வெளியில் வருகின்றனர். இதனால் சென்னை மாநகரில் உள்ள சாலைகளில் ஆள் நடமாட்டம் இல்லாமல் குறைவான வாகனங்களே காணப்படுகின்றன.

இதனால் சாலைகள் வெறிச்சோடி காணப்படுகின்றன. இதேபோல் சென்னையில் ஆயிரக்கணக்கான தொழிற்சாலைகள் மூலம் பல்வேறு விதமான பொருட்கள் உற்பத்தி செய்யப்படுகிறது. தற்போது தொழிற்சாலைகள் இயங்குவதற்கும் அனுமதி மறுக்கப்பட்டுள்ளதால் அவையும் மூடப்பட்டுள்ளன. இதனால் தொழிற்சாலையிலிருந்து வெளிவரும் நச்சு கலந்த புகையளவும் குறைந்துள்ளன.

இதுபோன்ற காரணங்களால் சென்னையில் முன்னெப்போதும் இல்லாத வகையில் காற்றின் மாசு குறைந்துள்ளதாக, தமிழ்நாடு மாசுக்கட்டுப்பாட்டு வாரியம் தெரிவித்துள்ளது. சென்னையில் நான்கு இடங்களில் காற்றின் தரத்தைக் கண்டறியும் மையங்களை ஏற்படுத்தி, அதன் மூலம் தினமும் காற்றின் தரத்தை மாசுக் கட்டுப்பாட்டு வாரியம் கண்காணித்துவருகிறது.

தற்போது சென்னையில் எடுக்கப்படும் காற்றின் அளவை, கடந்த மாதத்துடன் ஒப்பிடுகையில் மிகவும் குறைவாக உள்ளது. அதாவது கடந்த மாதம் 28ஆம் தேதி காற்றில் மிதக்கும் 2.5 மைக்ரான் அளவு ஆலந்தூரில் 35.83 ஆக இருந்தபோது, தற்போது இம்மாதம் 28ஆம் தேதி இதன் அளவு 28.16ஆக குறைந்துள்ளது.

இதேபோல் ஒவ்வொரு பகுதியிலும் காற்று மாசு குறைந்து உள்ளது. இதே போல் காற்றிலுள்ள பத்து மைக்ரான் அளவு கொண்ட கார்பன் மோனாக்சைடு, கந்தக டை ஆக்சைடு போன்றவற்றை ஆய்வுக்கு உட்படுத்தும்போது, அதன் அளவும் குறைந்துள்ளது என்பது குறிப்பிடத்தக்கது.

வாகனங்கள் இயக்கம் குறைவு, தொழிற்சாலைகள் இயக்கமின்மை போன்ற காரணங்களால், காற்றிலுள்ள மாசு வெகுவாகக் குறைந்துள்ளது குறிப்பிடத்தக்கது.

இதையும் படிங்க...தமிழ்நாட்டில் கரோனாவுக்கு மேலும் இருவர் உயிரிழப்பு!