சென்னை மாநகராட்சி ஆணையர் ககன்தீப்சிங் பேடி தலைமையில் அம்மா மாளிகை கூட்டரங்கில் ஊரடங்கு அமலாக்கக் குழுவினருடன் (Zonal Enforcement Team) ஆலோசனைக் கூட்டம் நடைபெற்றது. இதில் முதன்மைச் செயலாளர், பெருநகர காவல் துறை ஆணையர் சங்கர் ஜிவால் ஆகியோர் கலந்துகொண்டு ஆலோசனைகளை வழங்கினர்.
ஊரடங்கு அமலாக்கக் குழுவினருக்கு ஒதுக்கப்பட்ட மண்டலத்திற்குட்பட்ட பகுதிகளில் நாள்தோறும் ரோந்து பணியில் ஈடுபட்டு அரசின் கரோனா பாதுகாப்பு வழிமுறைகளை பின்பற்றாத நபர்கள், வணிக நிறுவனங்கள் மீது சட்டரீதியான நடவடிக்கை மேற்கொள்ள வேண்டும், தொடர்ந்து அரசின் வழிமுறைகளை பின்பற்றாத கடைகளுக்கு சீல் வைக்க வேண்டும், முகக்கவசம் அணியாமல், தகுந்த இடைவெளியை பின்பற்றாத நபர்களிடமிருந்து அபராதம் வசூலிக்க வேண்டும் என அறிவுறுத்தப்பட்டுள்ளது.
அதன்படி சென்னை முழுவதும் ஏப்ரல் 9ஆம் தேதி முதல் இன்றுவரை அரசின் கட்டுப்பாடுகளை பின்பற்றாத நபர்களிடமிருந்து ஒரு கோடியே 34 லட்சத்து 46ஆயிரத்து 390 ரூபாய் அபராதம் வசூலிக்கப்பட்டுள்ளது. இதில் மே 6ஆம் தேதியில் இருந்து மண்டல ஊரடங்கு அமலாக்க குழுவின் மூலம் மட்டும் ரூ.21,21800 அபராதம் வசூலிக்கப்பட்டுள்ளது என மாநகராட்சி தெரிவித்துள்ளது.