தமிழ்நாட்டில் 10ஆம் வகுப்பு தேர்வு ரத்தாகிறது?

சென்னை: 10ஆம் வகுப்பு பொதுத்தேர்வை ரத்துசெய்துவிட்டு அனைவரையும் தேர்ச்சிசெய்து அரசு அறிவிக்க வாய்ப்பு இருப்பதாகத் தகவல் வெளியாகியுள்ளது.

தமிழ்நாட்டில் கரோனாவின் தீவிரம் காரணமாக பல்வேறு துறைகள் பாதிக்கப்பட்டது போல், கல்வித் துறையும் கடுமையான சோதனைக்கு உள்ளானது. கற்றல் கற்பித்தல் பணிகள் பாதித்ததோடு, தேர்வுப் பணிகள் கடுமையாகப் பாதிக்கப்பட்டன. 11, 12ஆம் வகுப்பு மாணவர்களுக்கான தேர்வுகள் 99 விழுக்காடு முடிந்த நிலையில், 10ஆம் வகுப்பு தேர்வு மட்டும் நடத்த முடியாமல்போனது. மார்ச் 2ஆம் தேதிமுதல் நடைபெறும் என அறிவிக்கப்பட்ட தேர்வு, பின்னர் ஏப்ரல் 15ஆம் தேதி முதல் நடைபெறும் என இரண்டாவதாக அறிவிக்கப்பட்டு, பின்னர் மூன்றாவதாக ஜூன் 1ஆம் தேதிமுதல் நடைபெறும் என அறிவிக்கப்பட்டது.

ஆனால் தற்போது, நான்காவது முறையாக ஜூன் 15ஆம் தேதிமுதல் நடைபெறும் என அறிவிக்கப்பட்டுள்ளது. இப்படி நான்கு முறை அறிவிக்கப்பட்ட பத்தாம் வகுப்பு பொதுத்தேர்வு பிரச்னை பல முனைகளிலும் சூறாவளியாக மாறியுள்ளது.

கரோனா கோரத்தாண்டவம் ஆடிவரும் நிலையில், பாதிப்பு மிகக் குறைவாக உள்ள அண்டை மாநிலமான தெலங்கானாவில் 10ஆம் வகுப்பு பொதுத்தேர்வு ரத்துசெய்யப்பட்டதால், அதே போன்றும் தமிழ்நாட்டிலும் தேர்வை ரத்துசெய்ய அரசுக்கு அழுத்தம் வந்துகொண்டிருக்கிறது.

திட்டமிட்டபடி தேர்வை நடத்த வேண்டும் என்ற உறுதியுடன் தமிழ்நாடு அரசு இருந்தபோதும், மாணவர்களின் உயிருக்கு ஏதேனும் நேர்ந்தால் யார் பொறுப்பேற்பது? உள்ளிட்ட பல கேள்விகளை தமிழ்நாடு அரசிடம் சென்னை உயர் நீதிமன்றம் கேட்டுள்ளது. நீதிமன்றத்தின் இவ்வளவு பெரிய கேள்விக்குப் பிறகும் தேர்வை நடத்தி மாணவர்களுக்குத் தொற்று ஏற்பட்டு, அதனால் ஏதாவது அசம்பாவிதம் நடந்தால் நிலைமை விபரீதமாக முடிவதோடு மட்டுமின்றி, அரசுக்கு மிகப்பெரிய அவப்பெயர் ஏற்படும் என்பதைத் தமிழ்நாடு அரசு தற்போது புரிந்துகொண்டிருப்பதாகத் தெரிகிறது.

நீதிமன்றம் உத்தரவு பிறப்பிப்பதற்கு முன்பாக தாமாகவே தேர்வு ரத்து என்ற முடிவை அறிவிக்கலாம் என தமிழ்நாடு அரசு ஆலோசித்துவருகிறது. ஆனால் நீதிமன்றத்தில் இது குறித்து பதிலளிக்க அரசு கால அவகாசம் கேட்டுள்ளது.

இந்நிலையில் முக்கிய ஆலோசனையை முதலமைச்சர் இன்று நடத்துகிறார். இந்தியாவில் குஜராத், மகாராஷ்டிரா, உத்தரப் பிரதேசம், பஞ்சாப், தெலங்கானா உள்ளிட்ட மாநிலங்களில் பத்தாம் வகுப்பு பொதுத்தேர்வு நடத்தாமல் தேர்ச்சி பெற்றதாக அறிவித்துள்ளனர். அதேபோல் தமிழ்நாட்டிலும் 10ஆம் வகுப்பு பொதுத்தேர்வில் காலாண்டு, அரையாண்டு மதிப்பெண்களை மட்டும் வைத்து தேர்ச்சி அறிவித்தால் சிலர் நீதிமன்றத்திற்குச் செல்ல வாய்ப்பு உள்ளது.

மாணவர்களில் சிலர் காலாண்டு அல்லது அரையாண்டுத் தேர்வு ஏதாவது ஒன்றினை எழுதாமல் இருந்திருக்கலாம். அந்த மாணவர்களுக்குத் தேர்ச்சி அறிவிப்பதில் சிக்கல் ஏற்படும். இதுபோன்ற சிக்கல்களைத் தீர்ப்பதற்காகப் பத்தாம் வகுப்பு பொதுத்தேர்வு எழுதும் மாணவர்களுக்குத் தேர்வுக்கூட நுழைவுச்சீட்டு வழங்கப்பட்டுள்ளது.

மாணவர்கள் எத்தனை பேர் தேர்வுக்கூட நுழைவுச்சீட்டைப் பெற்றுள்ளனர் என்ற விவரத்தினை பள்ளிக் கல்வித் துறை அலுவலர்கள் வாங்கியுள்ளனர். பத்தாம் வகுப்பு எழுதுவதற்கு விண்ணப்பித்த மாணவர்களில் தேர்வுக்கூட நுழைவுச்சீட்டு உள்ள மாணவர்கள் அனைவரும் தேர்வு எழுத தயாராக உள்ளனர் என நீதிமன்றத்தில் தெரிவிக்கவும் அரசு திட்டமிட்டுள்ளது.

தேர்வுக்கூட நுழைவுச்சீட்டு வாங்கிய மாணவர்களில் காலாண்டு, அரையாண்டுத் தேர்வு மதிப்பெண்களைக் கணக்கில்கொண்டு தேர்ச்சிப் பெற்றதாக அறிவிக்கவும் அந்த மதிப்பெண்களைச் சான்றிதழில் பதிவுசெய்து அளிக்கலாம் என்பது குறித்தும் அரசு ஆலோசித்துவருகிறது.

ஆனால் பத்தாம் வகுப்பு பொதுத்தேர்வு எழுதும் மாணவர்களின் நலனைக் கருத்தில்கொண்டு ரத்து என்றும், காலாண்டு, அரையாண்டு மதிப்பெண் அடிப்படையில் மாணவர்கள் தேர்ச்சி என்ற அறிவிப்பையும் வெளியிடவும் திட்டமிட்டுள்ளதாகத் தகவல்கள் வெளியாகியுள்ளன.

இதையும் படிங்க...பொதுத்தேர்வு நடத்துவது சரியா? மாநில அரசிற்கு ஸ்டாலின் கேள்வி