உற்சாகத்தை இழந்த ரமலான் - பள்ளிவாசல் முன்பு காவலர்கள் குவிப்பு

அரியலூர்: ஊரடங்கால் பள்ளிவாசலுக்குள் யாரும் தொழுகை நடத்த கூடாதென்று அனைத்து பள்ளிவாசல் முன்பும் காவல் துறையினர் பாதுகாப்புப் பணியில் ஈடுபட்டிருக்கின்றனர்.

உலகமெங்கும் வாழும் இஸ்லாமியர்களின் முதன்மையான பண்டிகை ரமலான். இஸ்லாமியர்களின் புனித மாதத்தின் இறுதியில் ரமலான் பண்டிகை கொண்டாடப்படுகிறது. ஒரு மாதம் கடுமையான விரதமிருந்து ரமலான் அன்று மசூதிகளில் இஸ்லாமியர்கள் நோன்பு திறப்பதை வழக்கமாகக் கொண்டுள்ளனர்.

அதுமட்டுமின்றி அருகில் உள்ள அண்டை வீட்டாருடன் இணைந்து, மதங்களைக் கடந்து மனிதத்தைப் போற்றும்வகையில் ரமலான் உற்சாகமாகக் கொண்டாடப்படும் பண்டிகையாகும்.

ஆனால், இந்தாண்டு ஊரடங்கு உத்தரவின் காரணமாக அனைத்து மசூதிகளும் மூடப்பட்டிருக்கின்றன. இதன் காரணமாக இஸ்லாமியர்கள் நோன்பு திறக்க முடியாமல் தவிக்கின்றனர்.

பள்ளிவாசல்கள் அனைத்தும் மூடப்பட்டிருப்பதால், தமிழ்நாடு முழுவதும் ரமலான் பண்டிகை உற்சாகம் இழந்து காணப்படுகிறது. இதனால் இஸ்லாமியர்கள் தங்கள் வீடுகளுக்குள்ளேயே தொழுகை நடத்தி ரமலானை கொண்டாடுகின்றனர்.

மேலும் பள்ளிவாசலுக்குள் யாரும் தொழுகை நடத்த கூடாதென்று அனைத்துப் பள்ளிவாசல் முன்பும் காவல் துறையினர் பாதுகாப்புப் பணியில் ஈடுபட்டிருக்கின்றனர். இதனால் பள்ளிவாசல் வந்த இஸ்லாமியர்கள் ஏமாற்றத்துடன் திரும்பிச் சென்றனர்.

இதையும் படிங்க:'இரக்கம், நல்லிணக்க உணர்வு அதிகரிக்கட்டும்' - மோடி ரமலான் வாழ்த்து