இந்தி தெரியாததால் கடன் வழங்க மறுத்த வங்கி மேலாளர் - மருத்துவருக்கு நேர்ந்த அவலம்!

அரியலூர்: 'இந்தி தெரியாது' என்ற காரணத்திற்காக ஓய்வு பெற்ற மருத்துவருக்கு கடன் வழங்க வங்கி மேலாளர் மறுத்த சம்பவம் பெரும் பரபரப்பை ஏற்படுத்தியுள்ளது.

அரியலூர் மாவட்டம், ஜெயங்கொண்டத்தில் வசித்து வரும் ஓய்வு பெற்ற தலைமை அரசு மருத்துவர், பாலசுப்பிரமணியன். இவர் கடந்த 25 ஆண்டுகளுக்கும் மேலாக பல்வேறு அரசு மருத்துவமனையில் மருத்துவராகப் பணிபுரிந்து கடைசியாக ஜெயங்கொண்டம் அரசு மருத்துவமனையில் தலைமை மருத்துவராகப் பணியாற்றி ஓய்வு பெற்றவர்.

இவர் கங்கைகொண்ட சோழபுரத்தில் உள்ள இந்தியன் ஓவர்சீஸ் வங்கியில் வங்கி கணக்கு வைத்து வரவு-செலவு பார்த்து வருகிறார். இந்நிலையில் ஜெயங்கொண்டம் பேருந்து நிலையம் அருகே உள்ள தனது இடத்தில் வணிக வளாகம் கட்ட முடிவு செய்து, கங்கைகொண்ட சோழபுரத்தில் உள்ள இந்தியன் ஓவர்சீஸ் வங்கிக்கு லோன் கேட்டுச் சென்றுள்ளார்.

வங்கியில் தற்போது மகாராஷ்டிராவைச் சேர்ந்த விஷால் பட்டேல் என்பவர் கிளை மேலாளராகப் பணியாற்றி வருகிறார். இவரிடம் சென்று பாலசுப்பிரமணியன் தனது இடம் சம்பந்தமான ஆவணங்கள், வரவு செலவு கணக்குகள் மற்றும் வருமான வரி செலுத்தும் படிவம் ஆகியவற்றை காண்பித்து கடன் கேட்டுள்ளார்.

அப்போது பேசிய வங்கி மேலாளர், "உனக்கு இந்தி தெரியுமா?"(Do u know Hindi) என ஆங்கிலத்தில் கேட்டுள்ளார். அதற்கு மருத்துவர் "எனக்கு இந்தி தெரியாது. ஆனால் தமிழும் ஆங்கிலமும் தெரியும்" (I don't know Hindi, but I know Tamil and English) என ஆங்கிலத்தில் பதிலளித்துள்ளார்.

அதன் பின் வங்கி மேலாளர், "நான் மகாராஷ்டிராவைச் சேர்ந்தவன், எனக்கு இந்தி தான் தெரியும்." (I am from Maharashtra, I know Hindi only) எனத் தெரிவித்துள்ளார்.

மருத்துவர் மீண்டும் தனது ஆவணங்களைக் காண்பித்து, "நான் உங்கள் கிளையில்தான் கணக்கு வைத்துள்ளேன். என்னிடம் எல்லா ஆவணங்களும் உள்ளன" என்று தெரிவித்தபோதும், வங்கி மேலாளர் மீண்டும் மீண்டும் மொழி பற்றியே பேசி, கடன் சம்பந்தமாக எந்த ஆவணத்தையும் பார்க்காமல் கடன் கொடுக்க இயலாது எனத் தெரிவித்துள்ளார்.

இந்நிலையில், மொழிப் பிரச்னை காரணமாக தனது அடிப்படை உரிமை மறுக்கப்பட்டுள்ளதாகவும்; இதனால் தனக்கு கடும் மன உளைச்சல் ஏற்பட்டதாகவும் வங்கி மேலாளருக்கு மான நஷ்டஈடு கேட்டு மருத்துவர் நோட்டீஸ் அனுப்பியுள்ளார். மேலும் இது தொடர்பாக நீதிமன்றத்தில் வழக்கு தொடரப்போவதாகவும் அவர் தெரிவித்தார்.

கங்கை முதல் கடாரம் வரை சென்று போரிட்டு வெற்றி பெற்ற ராசேந்திர சோழனின் தலைநகராக விளங்கிய கங்கை கொண்ட சோழபுரத்தில் 'இந்தி தெரியாது என்பதால் கடன் கிடையாது' என மேலாளர் தெரிவித்தது தன்னை மிகவும் வேதனை படுத்தியதாக ஓய்வு பெற்ற அரசு தலைமை மருத்துவர் வருத்தத்துடன் தெரிவித்தார்.

இது குறித்து வங்கி மேலாளரின் தொலைபேசியில் தொடர்பு கொண்டபோது அவர் அழைப்பை ஏற்கவில்லை.

இதையும் படிங்க: காவிரி ஆற்றுப் பகுதிகளில் தேசிய பசுமைத் தீர்ப்பாய உறுப்பினர்கள் ஆய்வு