டேவிஸ் கோப்பை: ஆறாவது முறையாக ஸ்பெயின் அணி சாம்பியன்!

டேவிஸ் கோப்பை டென்னிஸ் தொடரின் இறுதி ஆட்டத்தில் ஸ்பெயின் அணி 2-0 என்ற புள்ளிக்கணக்கில் கனடா அணியை வீழ்த்தி கோப்பையை வென்றது.

டேவிஸ் கோப்பை டென்னிஸ் தொடர் உலகின் பல்வேறு நாடுகளுக்கிடையிலான அணிகளுடன் நடைபெற்று வருகிறது. இத்தொடரின் இறுதி போட்டியில், ரஃபேல் நடால், பாடிஸ்டா அகுட் தலைமையிலான ஸ்பெயின் அணி, டெனிஸ் ஷாபோலோவ், ஃபெலிக்ஸ் ஆகர் - அலியாஸிம் தலைமையிலான கனடா அணியை எதிர்கொண்டது.

இந்த ஆட்டத்தின் முதல் போட்டியில் தனது தந்தை மரணத்திற்குப் பிறகு, கலந்து கொண்ட ஸ்பெயின் அணியின் நட்சத்திர வீரர் பாடிஸ்டா அகுட், கனடாவின் ஃபெலிக்ஸ் அகரை எதிர்கொண்டார். விறுவிறுப்பான இந்த ஆட்டத்தில் அகுட் 7-6, 6-3 என்ற நேர் செட் கணக்குகளில் அகரை வீழ்த்தி வெற்றி பெற்றார்.

இதன் மூலம் ஸ்பெயின் அணி 1-0 என்ற கணக்கில் முன்னிலைப் பெற்றது. அதனைத் தொடர்ந்து நடைபெற்ற இரண்டாவது ஆட்டத்தில் உலகின் நம்பர் ஒன் வீரரான ஸ்பெயின் நாட்டின் ரஃபேல் நடால், கனடாவின் டெனிஸ் ஷாபோலோவை எதிர்கொண்டார்.

பரபரப்பான இந்த ஆட்டத்தில் நடால் முதல் செட்கணக்கை 6-3 என்ற கணக்கில் கைப்பற்றி, ஷாபோலோவிற்கு அதிர்ச்சியளித்தார். அதன் பின் நடைபெற்ற இரண்டாம் சுற்று ஆட்டத்தில் இரு நாட்டு வீரர்களும் தங்களது திறமைகளை வெளிப்படுத்தியதால் ஆட்டம் டை பிரேக்கர் வரை சென்றது.

அதன்பின் டை பிரேக்கரில் ரஃபேல் நடால் 7-6 என்ற கணக்கில் இரண்டாவது செட்டை கைப்பற்றினார். இதன் மூலம் உலகின் முன்னணி வீரரான ரஃபேல் நடால் 6-3, 7-6 என்ற நேர் செட் கணக்குகளில் ஷாபோலோவை வீழ்த்தினார்.

இந்த வெற்றியின் மூலம் ஸ்பெயின் அணி டேவிஸ் கோப்பை இறுதிப்போட்டியில் 2-0 என்ற புள்ளிக்கணக்கில் கனடாவை வீழ்த்தி, ஆறாவது முறையாக சாம்பியன் பட்டத்தை வென்றது.

இதையும் படிங்க: ஒரே நாளில் இரண்டு போட்டிகள்; இறுதிப் போட்டிக்கு முன்னேறி கிளாடியேட்டர்ஸ் அசத்தல்!