டென்னிஸ்: நான்காம் சுற்றுக்கு போராடி முன்னேறிய ஜோகோவிச்!

ஃபுளோரிடா: மியாமி ஓபன் மாஸ்டர்ஸ் டென்னிஸ் தொடரில், முதல் நிலை வீரர் ஜோகோவிச், அர்ஜெண்டினாவின் ஃபெடரிகோ டெல்போனிஸை வீழ்த்தி நான்காம் சுற்றுக்கு முன்னேறியுள்ளார்.

மியாமி மாஸ்டர்ஸ் ஓபன் டென்னிஸ் தொடர் ஃபுளோரிடாவில் நடைபெற்று வருகிறது. இதில், ஆடவருக்கான ஒற்றையர் பிரிவு மூன்றாம் சுற்றில், முதல் நிலை வீரரான செர்பியாவின் நோவாக் ஜோகோவிச், அர்ஜெண்டினாவை சேர்ந்த ஃபெடரிகோ டெல்போனிஸை எதிர்கொண்டார்.

இதைத்தொடர்ந்து, ஆட்டத்தின் முதல் செட்டில் இரு வீரர்களும் சிறப்பான ஆட்டத்தை வெளிபடுத்தினர். இறுதியில், ஜோகோவிச் 7-5 என்ற கணக்கில் ஃபெடரிகோவை போராடி வீழ்த்தினார். பின்னர், நடைபெற்ற இரண்டாம் செட்டில் ஃபெடரிகோவின் மிரட்டலான ஆட்டத்தில் வீழ்ந்த ஜோகோவிச், 4-6 என்ற கணக்கில் தோல்வி அடைந்தார்.

இதனால், ஆட்டத்தின் வெற்றியாளரை தீர்மானிக்கும் மூன்றாவது செட்டில், தனது அனுபவமான ஆட்டத்தை வெளிபடுத்திய கோகோவிச் 6-1 என்ற கணக்கில் லாவகமாக கைப்பற்றினார். இறுதியில், ஜோகோவிச் 7-5, 4-6, 6-1 என்ற செட் கணக்கில் நான்காவது சுற்றுக்கு முன்னேறியுள்ளார். இதைத்தொடர்ந்து, நாளை நடைபெறவுள்ள நான்காம் சுற்றில், ஜோகோவிச், ஸ்பெயினின் பவ்டிஸ்டா அகட் உடன் மோதவுள்ளார்.