மியாமி ஒபன்: சிமோனாவை வீழ்த்தி இறுதிப் போட்டிக்கு முன்னேறிய பிளிஸ்கோவா!

புளோரிடா: மியாமி ஓபன் டென்னிஸ் தொடரின் பெண்கள் ஒற்றையர் பிரிவின் அரையிறுதிப் போட்டியில், சிமோனா ஹாலப்பை வீழ்த்தி கரோலினா பிளிஸ்கோவா இறுதிப் போட்டிக்கு முன்னேறியுள்ளார்.

2019ஆம் ஆண்டுக்கான மியாமி ஓபன் டென்னிஸ் தொடர் புளோரிடாவில் நடைபெற்றுவருகின்றன. இதன் பெண்கள் ஒற்றையர் பிரிவு ஆட்டத்தில் நட்சத்திர வீராங்கனைகள் சிமோனா ஹாலப் - பிளிஸ்கோவா மோதினர்.

தரவரிசைப் பட்டியலில் மூன்றாம் இடத்திலிருக்கும் ரோமானிய வீராங்கனை சிமோனா ஹாலப்பை ஏழாவது இடத்தில் இருக்கும் செக் குடியரசின் பிளிஸ்கோவா எதிர்த்து ஆடியதால் ரசிகளிடையே எக்கச்சக்க எதிர்பார்ப்பு இருந்தது. மேலும் இவ்விரு வீராங்கனைகளும் இதுவரை மோதிய 9 போட்டிகளில் 7இல் சிமோனா ஹாலப்பும், இரண்டில் பிளிஸ்கோவாவும் வென்றுள்ளனர்.

ஆட்டம் தொடங்கியதிலிருந்தே இரு வீராங்கனைகளும் அசாத்திய ஆட்டத்தை வெளிப்படுத்தினர். முதல் செட்டை 7-5 என செக் குடியரசு வீராங்கனை பிளிஸ்கோவா அபாரமாகக் கைப்பற்றினார். பின்னர் நடைபெற்ற இரண்டாவது செட்டில் சிறப்பாக ஆடிய பிளிஸ்கோவா 5-0 என வேகமாக முன்னேறி சிமோனாவுக்கு அதிர்ச்சியளிக்க, பின்னர் இறுதியாக 6-1 என இரண்டாவது செட்டை கைப்பற்றிய பிளிஸ்கோவா இறுதிப் போட்டிக்கு முன்னேறினார்.

சிமோனாவை வீழ்த்திய பிளிஸ்கோவா

இறுதிப் போட்டியில், பிளிஸ்கோவாவை எதிர்த்து ஆஸ்திரேலிய வீராங்கனை ஆஷ்லி பார்டி ஆடவுள்ளார்.