இத்தாலியன் ஓபன் 2020: காலிறுதிச்சுற்றுக்கு முன்னேறிய நடால்!

இத்தாலியன் ஓபன் டென்னிஸ் தொடரின் ஆடவர் ஒற்றையர் பிரிவு நான்காம் சுற்று ஆட்டத்தில் உலகின் இரண்டாம் நிலை வீரரான ரஃபேல் நடால் வெற்றி பெற்று காலிறுதிச்சுற்றுக்கு முன்னேறினார்.

கரோனா வைரஸ் அச்சுறுத்தலுக்கு மத்தியில் பிரபல டென்னிஸ் தொடரான இத்தாலியன் ஓபன் தொடர் அந்நட்டின் பல்வேறு நகரங்களில் நடைபெற்றுவருகிறது. இதில் இன்று நடைபெற்ற ஆடவர் ஒற்றையர் பிரிவு நான்கம் சுற்று ஆட்டத்தில் உலகின் இரண்டாம் நிலை வீரரான ஸ்பெயினின் ரஃபேல் நடால், செர்பியாவின் துசன் லாஜோவிக்கை எதிர்கொண்டார்.

பரபரப்பான இப்போட்டியின் முதல் செட்டை நடால் 6-1 என்ற கணக்கில் கைப்பற்றி அசத்தினார். தொடர்ந்து நடைபெற்ற இரண்டாவது செட் ஆட்டத்திலும் சிறப்பாக செயல்பட்ட நடால் 6-3 என்ற கணக்கில் செட்டை கைப்பற்றி லாஜோவிக்கிற்கு அதிர்ச்சியளித்தார்.

இதன்மூலம் ஸ்பெயினின் ரஃபேல் நடால் 6-1, 6-3 என்ற நேர் செட் கணக்குகளில் செர்பியாவின் துசன் லாஜோவிக்கை வீழ்த்தி, 15ஆவது முறையாக இத்தாலின் ஓபன் டென்னிஸ் தொடரின் காலிறுதிச்சுற்றுக்கு முன்னேறினார்.

இதையும் படிங்க:ஜம்மு - காஷ்மீர் வீரர்களுக்கு பயிற்சியளிக்கும் ரெய்னா...!