பிரஞ்சு ஓபன்: கால் இறுதிச் சுற்றுக்கு முன்னேறிய நடால்!

பிரஞ்சு ஓபன் ஆடவர் ஒற்றையர் பிரிவு நான்காம் சுற்று ஆட்டத்தில் உலகின் முன்னணி வீரர் ரஃபேல் நடால் வெற்றி பெற்று கால் இறுதிச் சுற்றுக்கு முன்னேறியுள்ளார்.

கரோனா அச்சுறுத்தலுக்கு மத்தியில் பிரஞ்சு ஓபன் டென்னிஸ் தொடர், அந்நாட்டின் பல்வேறு நகரங்களில் நடைபெற்று வருகிறது.

இதில் இன்று (அக்.04) நடைபெற்ற ஆடவர் ஒற்றையர் பிரிவு நான்காம் சுற்று ஆட்டத்தில் உலகின் முன்னணி வீரரான ஸ்பெயினின் ரஃபேல் நடால், அமெரிக்காவின் செபாஸ்டியன் கோர்டாவை எதிர்த்து விளையாடினார்.

விறுவிறுப்பாக நடைபெற்ற இந்த ஆட்டத்தின் முதல் செட்டை 6-1 என்ற கணக்கில் கைபற்றிய நடால், இரண்டாவது செட்டையும் 6-1 என்ற கணக்கில் கைப்பற்றி செபாஸ்டியனுக்கு அதிர்ச்சியளித்தார்.

தொடர்ந்து நடைபெற்ற மூன்றாவது செட் ஆட்டத்திலும் சிறப்பாக செயல்பட்ட நடால், 6-2 என்ற கணக்கில் செட்டை கைப்பற்றி அசத்தினார்.

இதன் மூலம் பிரஞ்சு ஓபன் டென்னிஸ் தொடரின் நான்காம் சுற்று ஆட்டத்தில் ரஃபேல் நடால் 6-1, 6-1, 6-2 என்ற செட் கணக்கில் செபாஸ்டியன் கோர்டாவை வீழ்த்தி கால் இறுதிச் சுற்றுக்கு முன்னேறியுள்ளார்.

இதையும் படிங்க:பிரஞ்சு ஓபன்: சிமோனா ஹாலெப் அதிர்ச்சித் தோல்வி!