#WuhanOpen: 'பார்ட்டி மோடில் ஆஷ்லி பார்டி'!

வுகான் டென்னிஸ் தொடரின் மகளிர் ஒற்றையர் பிரிவு அரையிறுதிப் போட்டிக்கு ஆஸ்திரேலிய வீராங்கனை ஆஷ்லே பார்டி முன்னேறியுள்ளார்.

சீனாவின் ஹுபெய் நகரில் மகளிர்களுக்கான வுகான் டென்னிஸ் போட்டி நடைபெற்று வருகிறது. இதில், இன்று நடைபெற்ற மகளிர் ஒற்றையர் பிரிவு காலிறுதிப் போட்டியில் ஆஸ்திரேலிய வீராங்கனை ஆஷ்லே பார்டி, குரோஷியா வீராங்கனை பெட்ரா மார்டிக்குடன் பலப்பரீட்சை நடத்தினார்.

விறுவிறுப்பாக நடைபெற்ற இப்போட்டியின் முதல் செட்டை பார்டி 7-6 என்ற கணக்கில் டை பிரேக்கர் முறையில் வென்றார். பின்னர், இரண்டாவது செட்டில் 3-6 என்ற கணக்கில் தோல்வியடைந்ததால், ஆட்டத்தின் வெற்றியாளரை தீர்மானிக்கும் மூன்றாவது செட் போட்டி நடைபெற்றது.

இதில், ஆதிக்கம் செலுத்திய பார்டி 6-3 என்ற கணக்கில் லாவகமாக வென்றார். இதன்மூலம், ஆஷ்லே பார்டி 7-6, 3-6, 6-3 என்ற செட் கணக்கில் வெற்றிபெற்று அரையிறுதிப் போட்டிக்கு முன்னேறியுள்ளார். நாளை நடைபெறும் அரையிறுதிப் போட்டியில் பெலாரஸ் நாட்டைச் சேர்ந்த ஆர்யா சபாலெங்காவை சந்திக்கவுள்ளார்.

ஆஸ்திரேலியாவை சேர்ந்த ஆஷ்லே பார்டி சமீபத்தில் நடைபெற்ற பிரெஞ்சு ஓபன் டென்னிஸ் கிராண்ட்ஸ்லாம் பட்டத்தை வென்றார் என்பது குறிப்பிடத்தக்கது