ஆஸ்திரேலியன் ஓபன் தகுதிச்சுற்று: இறுதிப்போட்டிக்கு முன்னேறிய அங்கிதா ரெய்னா!

துபாயில் நடைபெறும் ஆஸ்திரேலியன் ஓபன் தகுதிச்சுற்றுப் போட்டியில் இந்தியாவின் நட்சத்திர வீராங்கனை அங்கிதா ரெய்னா இறுதிப்போட்டிக்கு முன்னேறியுள்ளார்.

ஆஸ்திரேலியன் ஓபன் டென்னிஸ் தொடர் அடுத்த மாதம் 10ஆம் தேதி முதல் மெல்போர்னில் நடைபெறவுள்ளது. இத்தொடருக்கான தகுதிச்சுற்றுப் போட்டிகள் துபாயில் நடைபெறுகின்றன.

இதில் இன்று நடைபெற்ற மகளிர் ஒற்றையர் பிரிவு ஆட்டத்தில் இந்தியாவின் அங்கிதா ரெய்னா - உக்ரைனின் கட்டரினா சவாட்ச்காவை எதிர்கொண்டார்.

இப்போட்டியின் ஆரம்பம் முதலே சிறப்பான ஆட்டத்தை வெளிப்படுத்திய அங்கிதா முதல் செட்டை 6-2 என்ற கணக்கில் கைப்பற்றினார். அதன்பின் நடைபெற்ற இரண்டாம் செட்டிற்கான ஆட்டத்தில் கட்டரினா 2-6 என்ற கணக்கில் செட்டைக் கைப்பற்றினார்.

பின்னர் ஆட்டத்தின் வெற்றியைத் தீர்மானிக்கும் மூன்றாவது செட் ஆட்டத்தில் அபார ஆட்டத்தை வெளிப்படுத்திய அங்கிதா ரெய்னா 6-3 என்ற கணக்கில் செட்டைக் கைப்பற்றி போட்டியை வென்றார்.

இதன்மூலம் இந்தியாவின் அங்கிதா ரெய்னா 6-2, 2-6, 6-3 என்ற செட் கணக்கில் உக்ரைனின் கட்டரினா சவாட்ச்காவை வீழ்த்தி, ஆஸ்திரேலியன் ஓபன் தகுதிச் சுற்றின் இறுதிப்போட்டிக்கு முன்னேறினார்.

இதையும் படிங்க: தாய்லாந்து ஓபன்: முதல் சுற்றிலேயே வெளியேறிய பிவி சிந்து, சாய் பிரனீத்!