தங்கம் வெல்வதே எனது ஒரே கனவு- மேரி கோம்!

அடுத்தாண்டு டோக்கியோவில் நடைபெறவுள்ள ஒலிம்பிக் போட்டியில் தங்கம் வெல்வதே தனது ஒரே கனவு என இந்திய குத்துச்சண்டை வீராங்கனை மேரி கோம் தெரிவித்துள்ளார்.

இந்தியாவில் குத்துச்சண்டை போட்டியில் கோலோச்சி இருப்பவர் மேரி கோம். மணிப்பூரைச் சேர்ந்த 36 வயதான இவர் உலக குத்துச்சண்டை தொடரில் (51 கி.கி பிரிவில்) இதுவரை ஆறு தங்கப் பதக்கங்களை வென்று சாதனை படைத்துள்ளார். இருப்பினும் ஒலிம்பிக் போட்டியில் இந்தியாவுக்காக தங்கம் வெல்வதே தனது ஒரே குறிக்கோள் என அவர் தொடர்ந்து பலமுறை தெரிவித்திருக்கிறார்.

கடந்த ஜனவரி மாதம் ஜோர்டானில் நடைபெற்ற ஆசிய ஒலிம்பிக் குத்துச்சண்டை தொடரில் வெண்கலப் பதக்கம் வென்று, டோக்கியோவில் நடைபெறவுள்ள ஒலிம்பிக் போட்டிக்குத் தகுதிபெற்றார். இதனிடையே, வரும் ஜூலை 24ஆம் தேதி டோக்கியோவில் நடைபெறவிருந்த 32ஆவது ஒலிம்பிக் போட்டி கரோனா வைரஸ் காரணமாக அடுத்தாண்டிற்கு ஒத்திவைக்கப்பட்டது.

இந்த ஒலிம்பிக் போட்டிதான் மேரி கோம் பங்கேற்கும் இறுதி ஒலிம்பிக் போட்டியாக இருக்கும் என தெரிகிறது. முன்னதாக 2012 லண்டன் ஒலிம்பிக்கில் வெண்கலம் வென்ற இவர் இம்முறை தனது கடைசி ஒலிம்பிக்கில் தங்கம் வெல்வாரா என்ற எதிர்பார்ப்பு எழுந்துள்ளது. இந்நிலையில், இது குறித்து பேசிய அவர்,

"நான் எப்போது களத்தில் களமிறங்கினாலும் என் மீதான எதிர்பார்ப்பு அதிகமாகவே இருக்கும் என்பது எனக்கு தெரியும். என்னை எவ்வாறு மேம்படுத்திக்கொள்வது, எனது பலவீனங்களை எப்படி சரிசெய்துகொள்வது உள்ளிட்ட விஷயங்களை சிந்தித்து நான் பல நாள்கள் தூங்காமல் இருந்துள்ளேன்.

இன்னும் எனது வலிமை, ஆற்றல், வேகம் ஆகியவற்றை மேம்படுத்த நான் தீவிரம் காட்டிவருகிறேன். இம்முறையாவது ஒலிம்பிக்கில் தங்கப்பதக்கம் வெல்ல வேண்டும் என்பதுதான் எனது ஒரே கனவு" என்றார்.

இதையும் படிங்க:72 மணிநேரம்... 271 போட்டிகள்... கரோனாவுக்கு நிதி திரட்டிய தமிழக வீரர்!