டார்ட்மண்டை வீழ்த்தி புள்ளிகள் பட்டியலில் முன்னிலையில் நீடிக்கும் பேயர்ன் முனிச்

நடப்பு சீசன் பண்டஸ்லிகா கால்பந்து தொடரின் நேற்றைய லீக் போட்டியில் நடப்பு சாம்பியன் பேயர்ன் முனிச் அணி 1-0 என்ற கோல் கணக்கில் டார்ட்மண்ட் அணியை வீழ்த்தியது.

ஜெர்மனி நாட்டில் கரோனா வைரசின் தாக்கம் கட்டுக்குள் வந்த பிறகு அந்நாட்டில் நிறுத்திவைக்கப்பட்டிருந்த நடப்பு சீசனுக்கான பண்டஸ்லிகா கால்பந்து தொடரை பார்வையாளர்களின்றி நடத்த அனுமதி வழங்கப்பட்டிருந்தது.

இந்நிலையில், நேற்று நடைபெற்ற லீக் போட்டியில் நடப்பு சாம்பியன் பேயர்ன் முனிச் அணி புரோஷியா டார்ட்மண்ட் அணியை எதிர்கொண்டது. புள்ளிகள் பட்டியலில் பேயர்ன் முனிச் அணி 61 புள்ளிகளுடன் முதலிடத்திலும், டார்ட்மண்ட் அணி 57 புள்ளிகளுடன் இரண்டாவது இடத்திலும் இருந்தன.

இதனால், இப்போட்டி மீதான எதிர்பார்ப்பு ரசிகர்கள் மத்தியில் அதிகரித்தது. பண்டஸ்லிகா தொடரில் தலைசிறந்த இரு அணிகள் மோதிய இப்போட்டி எப்போதும் போல பரபரப்பிற்கு பஞ்சமில்லாமல் நடைபெற்றது. இரு அணிகளும் ஆட்டத்தின் தொடக்கத்திலிருந்தே அட்டாக்கிங் முறையில் விளையாடின.

அதன் பலனாக இரு அணிகளுக்கும் கோல் அடிக்கும் வாய்ப்புகள் கிடைத்தாலும் அதை கோலாக மாற்ற முடியாமல் போனது. இந்த நிலையில், ஆட்டத்தின் 43ஆவது நிமிடத்தில் பேயர்ன் முனிச் அணியின் நடுகள வீரர் ஜோஷ்வா கிம்மிச் கோல் அடித்து அசத்தினார். இதற்கு டார்ட்மண்ட் அணியால் பதில் கோல் அடிக்க முடியாமல் போனது.

இறுதியில் பேயர்ன் முனிச் அணி 1-0 என்ற கோல் கணக்கில் டார்ட்மண்டை வீழ்த்தி புள்ளிகள் பட்டியலில் முன்னிலை வகிக்கிறது. பேயர்ன் முனிச் அணி விளையாடிய 28 போட்டிகளில் 64 புள்ளிகளுடன் தொடர்ந்து முதலிடத்திலும், டார்ட்மண்ட் அணி 28 போட்டிகளில் 57 புள்ளிகளுடன் தொடர்ந்து இரண்டாவது இடத்திலும் நீடிக்கின்றன.

இதையும் படிங்க:முடிவுக்கு வந்ததா ஸ்லாத்தான் இப்ராஹிமோவிச்சின் கால்பந்து பயணம்?