ஐரோப்பிய யூனியனின் கால்பந்து கூட்டமைப்பால் ஆண்டுதோறும் UEFA சாம்பியன்ஸ் லீக் தொடர் நடத்தப்படுகிறது. இந்தாண்டுக்கான சீசன் தற்போது நடைபெற்றுவருகிறது. இதனிடையே இந்தத் தொடரின் எஃப் பிரிவில் இடம்பெற்றுள்ள ஸ்பெயினைச் சேர்ந்த பார்சிலோன கிளப் அணிக்கும் செக் குடியரசைச் சேர்ந்த கிளப் அணியான ஸ்லேவியா பிராகா அணிக்கும் இடையேயான போட்டி நடைபெற்றது.
இப்போட்டி தொடங்கிய மூன்றாவது நிமிடத்திலேயே பார்சிலோனா அணியின் கேப்டன் மெஸ்ஸி கோல் அடித்து அசத்தினார். அவர் அடித்த இந்த கோலின் மூலம் சாம்பியன்ஸ் லீக் தொடரில் தொடர்ச்சியாக 15 ஆண்டுகளாக கோல் அடிக்கும் வீரர் என்ற சாதனையை மெஸ்ஸி படைத்தார். மேலும் 33 வெவ்வேறு கிளப்புகளுக்கு எதிராக கோல் அடித்த மூன்றாவது வீரர் என்ற சாதனையை கிறிஸ்டியானோ ரொனால்டோ, ரியல் மாட்ரிட் ஸ்ட்ரைக்கர் ரவுலுடன் பகிர்ந்துள்ளார்.