ஐஎஸ்எல் : நார்த் ஈஸ்ட்டை எதிர்கொள்ளும் ஹைதராபாத்!

ஐஎஸ்எல் கால்பந்து தொடரில் இன்று நடைபெறும் லீக் ஆட்டத்தில் நார்த் ஈஸ்ட் எஃப்சி அணி - ஹைதராபாத் எஃப்சி அணியை எதிர்கொள்கிறது.

கரோனா கட்டுப்பாட்டு விதிகளுடன் ஐஎஸ்எல் கால்பந்து தொடரின் ஏழாவது சீசன் நடைபெற்றுவருகிறது. திலக் மைதான் மைதானத்தில் இன்று இரவு 7.30 மணிக்கு நடைபெறும் லீக் போட்டியில் ஹைதராபாத் எஃப்சி அணி - நார்த் ஈஸ்ட் யுனைடெட் அணியை எதிர்கொள்கிறது.

ஹைதராபாத் எஃப்சி

சீசன் தொடக்கத்தை வெற்றியுடன் ஆரம்பித்த ஹைதராபாத் எஃப்சி அணி, அதன்பின் நடைபெற்ற போட்டிகளில் சரிவர செயல்படாமல் தோல்வியைத் தழுவியது. இதையடுத்து சென்னையின் எஃப்சி உடனான முந்தையப் போட்டியில் 4-1 என்ற கோல் கணக்கில் வெற்றி பெற்றது.

இந்த சீசனில் 9 லீக் ஆட்டங்களில் விளையாடியுள்ள ஹைதராபாத் அணி 3 வெற்றி, மூன்று தோல்வி, மூன்று டிரா என புள்ளிப்பட்டியலில் ஆறாவது இடத்தைப் பிடித்துள்ளது. இன்றையப் போட்டியில் ஹைதராபாத் அணி வெற்றிபெற்று புள்ளிப்பட்டியலில் முன்னேறும் என ரசிகர்கள் எதிர்பார்த்துள்ளனர்.

நார்த் ஈஸ்ட் யுனைடெட்

நார்த் ஈஸ்ட் யுனைடெட் அணியும் நடப்பு சீசனில் பங்கேற்ற 9 லீக் போட்டிகளில் 2 வெற்றி, 5 டிரா, 2 தோல்விகள் என புள்ளிப்பட்டியலின் ஏழாவது இடத்தில் உள்ளது.

வலிமையான அட்டாக்கிங் வீரர்களைக் கொண்டுள்ள நார்த் ஈஸ்ட் அணி, இன்றைய போட்டியில் வெற்றி பெற்று அசத்தும் என அந்த அணி ரசிகர்கள் ஆவலுடன் காத்திருக்கின்றனர்.

இதையும் படிங்க: அணிகளின் வீரர் தக்கவைப்புக்கான காலக்கெடுவை விதித்தது ஐபிஎல் நிர்வாகக் குழு!