ஐஎஸ்எல்:புள்ளிப்பட்டியலில் முதலிடத்திற்கு முன்னேறிய ஏடிகே மோகன் பாகன்!

ஐஎஸ்எல் கால்பந்து தொடரில் இன்று நடைபெற்ற லீக் ஆட்டத்தில் ஏடிகே மோகன் பாகன் அணி 2-0 என்ற கோல் கணக்கில் நார்த் ஈஸ்ட் யுனைடெட் அணியை வீழ்த்தி வெற்றி பெற்றது.

ஐஎஸ்எல் கால்பந்து தொடரின் லீக் ஆட்டங்கள் பரபரப்புடன் நடைபெற்று வருகின்றன. இதில் இன்று (ஜன.03) நடைபெற்ற லீக் ஆட்டத்தில் ஏடிகே மோகன் பாகன் அணி - நார்த் ஈஸ்ட் யுனைடெட் அணியை எதிர்கொண்டது.

பரபரப்பான இப்போட்டியின் தொடக்கம் முதலே இரு அணி வீரர்களும் வலிமையான டிஃபென்ஸ் ஆட்டத்தை வெளிப்படுத்தினர். முதல் பாதி ஆட்டநேர முடிவில் இரு அணிகளும் கோல் ஏதுமின்றி சமநிலையில் நீடித்தன.

பின்னர் தொடங்கிய இரண்டாம் பாதி ஆட்டத்தில் சிறப்பான ஆட்டத்தை வெளிப்படுத்தி வந்த ஏடிகே மோகன் பாகன் அணிக்கு நட்சத்திர வீரர் ராய் கிருஷ்ணா ஆட்டத்தின் 51ஆவது நிமிடத்தில் கோலடித்து, அணியின் கோல் கணக்கை தொடங்கிவைத்தார்.

அதன்பின் அசத்தலான ஆட்டத்தை வெளிப்படுத்திய பெஞ்சமின் மூலம் ஏடிகே அணிக்கு ஆட்டத்தின் 57ஆவது நிமிடத்தில் மற்றொரு கோலும் கிடைத்தது. பின்னர் நார்த் ஈஸ்ட் யுனைடெட் அணியின் கோலடிக்கும் அனைத்து முயற்சிகளையும் ஏடிகே மோகன் பாகன் தகர்த்தது.

இதனால் ஆட்டநேர முடிவில் ஏடிகே மோகன் பாகன் 2-0 என்ற கோல் கணக்கில் நார்த் ஈஸ்ட் யுனைடெட் அணியை வீழ்த்தி வெற்றி பெற்றது. இந்த வெற்றியின் மூலம் ஐஎஸ்எல் புள்ளிப்பட்டியலில் ஏடிகே மோகன் பாகன் அணி 20 புள்ளிகளைப் பெற்று முதலிடத்திற்கு முன்னேறியது.

இதையும் படிங்க:’வரவிருக்கும் போட்டிகளுக்கு இப்போதே நாங்கள் எங்களைத் தயார்படுத்தவுள்ளோம்' - கிரஹாம் ரீட்