இபிஎல்: காஸியின் இறுதி நிமிட கோலால் வெற்றி பெற்ற ஆஸ்டன் வில்லா!

இபிஎல் கால்பந்து தொடரில் இன்று (டிசம்பர் 12) நடைபெற்ற லீக் ஆட்டத்தில் ஆஸ்டன் வில்லா அணி 1-0 என்ற கோல் கணக்கில் வுல்ஃப்ஸ் அணியை வீழ்த்தி த்ரில் வெற்றி பெற்றது.

நடப்பு சீசனுக்கான இங்கிலீஷ் ப்ரீமியர் லீக் கால்பந்து தொடர் விறுவிறுப்பாக நடைபெற்றுவருகிறது. இத்தொடரில், இன்று நடைபெற்ற லீக் போட்டியில் ஆஸ்டன் வில்லா அணி, வுல்ஃப்ஸ் அணியை எதிர்கொண்டது.

பரபரப்பாக தொடங்கிய இந்த ஆட்டத்தின் தொடக்கம் முதலே இரு அணி வீரர்களும் வலிமையான டிஃபென்ஸ் ஆட்டத்தை வெளிப்படுத்தியதால், ஆட்டத்தில் அனல் பறந்தது. பின்னர் முதல் பாதி ஆட்டநேர முடிவில் இரு அணியும் கோலடிக்காததால், ஆட்டம் சமநிலையில் இருந்தது.

பின்னர் தொடங்கிய இரண்டாம் பாதி ஆட்டத்தின் போது இரு அணிகளும் கோலடிக்க முயற்சித்தனர். இதில் ஆட்டத்தின் 85ஆவது நிமிடத்தின் போது விதிகளை மீறி எதிரணி வீரரை தாக்கும் நோக்கில் விளையாடிய ஆஸ்டன் வில்லா அணியின் லூயிசிற்கு ரெட் கார்டு வழங்கப்பட்டது. பின்னர் ஆட்டத்தில் கூடுதல் நேரம் வழங்கப்பட்டது.

அதில் 90+4ஆவது நிமிடத்தில் கிடைத்த பெனால்டி வாய்ப்பை சரியாக பயன்படுத்திய ஆஸ்டன் வில்லா அணியின் அன்வர் எல் காஸி, அதனை கோலாக மாற்றி அணியின் வெற்றிக்கு உதவினார். பின்னர் ஆட்டத்தின் 90+5ஆவது நிமிடத்தில் வுல்ஃப்ஸ் அணியின் மவுடின்ஹோவுக்கு ரெட் கார்டு வழங்கப்பட்டது.

இதனால் ஆட்டநேர முடிவில் ஆஸ்டன் வில்லா அணி 1-0 என்ற கணக்கில் வுல்ஃப்ஸ் அணியை வீழ்த்தி த்ரில் வெற்றியைப் பதிவு செய்தது. இந்த வெற்றியின் மூலம் ஆஸ்டன் வில்லா அணி இபிஎல் புள்ளிப்பட்டியலில் 18 புள்ளிகளைப் பெற்று எட்டாவது இடத்திற்கு முன்னேறியுள்ளது.

இதையும் படிங்க:‘என்னுடைய உத்வேகம் மேரி கோம்’ - பாலா தேவி