பெரும் ஆரவாரத்துடன் தொடங்கிய ஐஎஸ்எல் (indian super league) தொடரின் ஏழாவது சீசன், நாளுக்கு நாள் ரசிகர்களின் எதிர்பார்ப்பை அதிகரித்து வருகிறது. இதில் இன்று (டிச.12) நடைபெற்ற லீக் ஆட்டத்தில் எஃப்சி கோவா அணி - ஒடிசா எஃப்சி அணியை எதிர்கொண்டது.
பரபரப்புடன் தொடங்கிய இப்போட்டியில் தொடக்க முதலே இரு அணிகளும் அபாரமான ஆட்டத்தை வெளிப்படுத்தி, ஒருவருக்கொருவர் கோல் அடிக்கவிடாமல் தடுத்தனர். இதையடுத்து முதல் பாதி ஆட்டத்தின்போது கிடைத்த கூடுதல் நேரமான 45+2ஆவது நிமிடத்தில் கோவா அணியின் நட்சத்திர வீரர் இகோர் அங்குலோ கோலடித்து அணியை முன்னிலைப் படுத்தினார்.
இதன் மூலம் முதல் பாதி ஆட்டநேர முடிவில் எஃப்சி கோவா அணி 1-0 என்ற கணக்கில் முன்னிலை பெற்றது. தொடர்ந்து நடைபெற்ற இரண்டாம் பாதி ஆட்டத்தில் தனது டிஃபென்ஸை வலிமைப்படுத்திய கோவா அணி, ஒடிசா அணியின் கோலடிக்கும் முயற்சிகளை தவிடுபொடியாக்கியது.
இதன் மூலம் ஆட்டநேர முடிவில் எஃப்சி கோவா அணி 1-0 என்ற கோல் கணக்கில் ஒடிசா எஃப்சி அணியை வீழ்த்தி, இந்த சீசனில் தனது இரண்டாவது வெற்றியைப் பதிவு செய்தது. மேலும் ஐஎஸ்எல் புள்ளிப்பட்டியலில் எட்டு புள்ளிகளைப் பெற்று, நான்காம் இடத்திற்கும் முன்னேறியது.
இதையும் படிங்க:ஐடிஎஃப் டென்னிஸ்: இரட்டையர் பிரிவில் சாம்பியன் பட்டம் வென்ற அங்கிதா ரெய்னா!
