கால்பந்து ரசிகர்களை வியப்பில் ஆழ்த்திய கோல்!

கோலாலம்பூர்: மலேசியன் எஃப்.ஏ. கோப்பை கால்பந்து அரையிறுதிப்போட்டியில் வீரர் ஒருவர், மைதானத்தின் நடுவில் இருந்து நேர்த்தியான முறையில் கோல் அடித்த சம்பவம் அனைவரையும் வியப்பில் ஆழ்த்தியது.

மலேசியாவில் உள்ள கால்பந்து கிளப்புகளுக்கு இடையே ஆண்டுதோறும் போட்டிகள் நடத்தப்படுவது வழக்கம். இந்தாண்டுக்கான தொடர் இறுதிக்கட்டத்தை எட்டியுள்ள நிலையில், முதல் அரையிறுதிப்போட்டி நேற்று முன்தினம் நடைபெற்றது. இதில் பகாங், பெராக் அணிகள் மோதின. ஆரம்பம் முதலே ஆதிக்கம் செலுத்திய பகாங் அணி வீரர்கள் ஹெரால்டு கோலன் 12ஆவது நிமிடத்திலும், மொகமடோவ் சுமரே 39ஆவது நிமிடத்திலும் கோல் அடித்தனர்.

பின்னர் இரண்டாவது பாதியில் 54ஆவது நிமிடத்தில், பெராக் அணியின் பார்த்திபன் ஜனசேகரன் கோல் அடித்தார். பின்னர் மேற்கொண்டு இரு அணி வீரர்களும் கோல் ஏதும் அடிக்காததால் ஆட்டம் 2- 1 என்ற நிலையே நீடித்தது. அதைத் தொடர்ந்து கூடுதலாக கடைசி ஐந்து நிமிடங்கள் ஒதுக்கப்பட்டன.

அப்போது கிடைத்த ஃப்ரீ கிக் வாய்ப்பை மிகச்சரியாக பயன்படுத்திய பகாங் அணி மிட்-ஃபீல்டர் ஹெரால்டு கோலன், மைதானத்தில் நடுப்பகுதியில் இருந்து ஓடி வந்து சரியான விகிதத்தில் பந்தை எட்டி உதைத்தார்.

உயரமாக சென்ற அந்தப் பந்து சரியாக எதிரணி கோல் கீப்பரின் தலைக்கு மேல் சென்று கீழாக இறங்கி அருமையான கோலாக விழுந்தது. இந்த கோல் மைதானத்தில் இருந்த அனைவரையும் ஒரு நொடி உறையவைத்து வியப்பின் உச்சத்திற்கே கொண்டுசென்றது.

இதன்மூலம் பகாங் அணி 3-1 என்ற கோல் கணக்கில் பெராக் அணியை வீழ்த்தியது.