போர்ட் ஆஃப் ஸ்பெயின்:மூன்று ஒருநாள் போட்டிகள், ஐந்து டி20 போட்டிகளை விளையாட இந்தியா அணி மேற்கு இந்திய தீவுகளுக்கு சுற்றுப்பயணம் மேற்கொண்டுள்ளது. இந்நிலையில், இரு அணிகளுக்கும் இடையேயான ஒருநாள் தொடரின் இரண்டாவது போட்டி டிரினிடாட் தீவுகளின் தலைநகர் போர்ட் ஆஃப் ஸ்பெயினில் உள்ள குயின்ஸ் பார்க் மைதானத்தில் இன்று (ஜூலை 24) நடைபெறுகிறது.
முன்னதாக, நேற்று முன்தினம் (ஜூலை 22) நடைபெற்ற முதல் போட்டியில் இந்திய அணி 3 ரன்கள் வித்தியாசத்தில் 'த்ரில்' வெற்றிபெற்று, தொடரில் முன்னிலை பெற்றது. இந்நிலையில், இன்றைய இரண்டாவது போட்டியையும் வென்று தொடரை கைப்பற்றும் முனைப்பில் இந்திய அணியும், சொந்த மண்ணில் தொடரை இழப்பதை தவிர்க்க மேற்கு இந்திய தீவுகள் அணியும் உள்ளன.
குவின்ஸ் பார்க் ஆடுகளம் பேட்டிங்கிற்கு சாதகமானது என்றாலும் இந்திய பந்துவீச்சாளர்கள் பார்டனர்ஷிப்பை உடைப்பதில் திணறுகின்றனர்.
சஹால், சிராஜ் ஆகியோர் முதல் போட்டியில் சிறப்பாக பந்து வீசியிருந்தனர். இன்றைய போட்டியிலும் அவர்களின் பங்களிப்பு இந்தியாவுக்கு இன்றியமையாதது. இங்கிலாந்து சுற்றுப்பயணத்திற்கு பின் அணியுடன் இணைந்த ஜடேஜா தற்போது தயாராக உள்ளதால் இன்றைய போட்டியில் அக்சர் படேலுக்கு பதிலாக விளையாட வாய்ப்புள்ளதாக கூறப்படுகிறது.
கடந்த போட்டியில் சிறப்பாக ஆட்டத்தை வெளிப்படுத்திய தவான், கில், ஷ்ரேயஸ் ஐயர் ஆகியோரின் பேட்டிங் ஆர்டரில் மாற்றமிருக்க வாய்ப்பில்லை. மிடில் ஆர்டரில் சூர்யகுமார், தீபக் ஹூடா, சஞ்சு சாம்சன் ஆகியோர் இன்று சோபிக்கும்பட்சத்தில் இந்தியா பெரிய ஸ்கோரை எட்ட வாய்ப்புள்ளது.