கிரிக்கெட் வரலாற்றில் வீடியோ ஆதாரம் இல்லாத சிறந்த இன்னிங்ஸ்!

2023 Cricket World Cup: 1983 உலக கோப்பை இறுதி போட்டியில் வெஸ்ட் இண்டீஸ் அணியை வீழ்த்தி, இந்திய அணி தனது முதல் கோப்பையை கைப்பற்றியது. அந்த தொடரில் கபில் தேவ்வின் பங்கு அதிகம். குறிப்பாக ஜிம்பாப்வே அணிக்கு எதிராக 175 ரன்கள் குவித்தது முக்கியத்துவம் பெறுகிறது. அதனை பற்றிய சிறிய தொகுப்பு.

ஹைதராபாத்: ஒருநாள் உலக கோப்பை முதல் இரண்டு எடிசன்களில் அதாவது 1975 மற்றும் 1979ல் அரை இறுதிக்கு கூட தகுதி பெறாமல் வெளியேறிய இந்திய அணி 1983ல் உலக கோப்பையை வெல்லும் என யாரும் கனவில் கூட நினைத்து பார்த்து இருக்க மாட்டார்கள். தொடர்ச்சியாக இரண்டு முறை கோப்பையை கைப்பற்றிய வெஸ்ட் இண்டீஸ் அணியை தடுத்து நிறுத்தியது கபில் தேவ் தலைமையிலான இந்திய அணி தான். ஆனால் மீண்டும் உலக கோப்பையை வெல்ல இந்திய அணி எடுத்து கொண்ட காலம் 28 வருடம் ஆகும்.

40 ஆண்டுகளுக்கு முன்பு கிடைத்த வாய்ப்பு: 1983ம் ஆண்டு ஜூன் 25ம் தேதி உலக கோப்பை மூன்றாவது எடிசனின் இறுதி போட்டி வெஸ்ட் இண்டீஸ் அணியை வீழ்த்தி இந்திய அணி கோப்பை கைப்பற்றியது. இதன் மூலம் வெஸ்ட் இண்டீஸ் அணியின் ஹட்ரிக் வெற்றி என்ற கனவை இந்திய அணி தகர்த்தது. குறிப்பாக அந்த தொடரில் இந்திய அணியின் கேப்டன் கபில் தேவ் டன்பிரிட்ஜ் வெல்ஸில் விளையாடியது ஒரு சிறந்த இன்னிங்ஸ் ஆகும். ஆனால் அந்த இன்னிங்ஸை பற்றி வெறும் கதையாகவே சொல்ல முடியுமே தவிற அதற்கு வீடியோ காட்சிகள் ஏதும் இல்லை என்பதே உண்மை.

ஐசிசி உலக கோப்பை 3வது எடிசன் 20வது போட்டியில் இந்திய அணி ஜிம்பாப்வே அணியை எதிர்கொண்டது. டாஸ் வென்ற இந்திய அணி முதலில் பேட்டிங்கை தேர்வு செய்தது. இதில் தொடக்க வீரராக களம் இறங்கிய சுனில் கவாஸ்கர் மற்றும் ஸ்ரீகாந்த் சோபிக்கவில்லை, இருவருமே டக் அவுட்டில் வெளியேறினர். பின்னர் களம் கண்ட மொஹிந்தர் அமர்நாத் 5, சந்தீப் பாட்டீல் 1, யஷ்பால் சர்மா 9, என்ற ரன்களில் ஆட்டமிழந்தனர். எதிரணியின் பந்து வீச்சாளர்களான பீட்டர் ராவ்சன் மற்றும் கெவின் குர்ரான் இந்திய அணியின் வீரர்களை பதம் பார்த்து கொண்டிருந்தனர்.

கபில் தேவ் - ரோஜர் பின்னி பார்ட்னர்ஷிப்: இந்திய அணி 5 விக்கெட்கள் இழப்பிற்கு 17 ரன்கள் மட்டுமே எடுத்திருந்த நிலையில், ரசிகர்களுக்கு இறுதியான நம்பிக்கையாக கேப்டன் கபில் தேவ் இருந்தார். இக்கட்டான சூழ் நிலையில், களம் கண்ட கபில் தேவ் ஆல் ரவுண்டர், ரோஜர் பின்னிவுடன் சேர்ந்து ரன்களை குவிக்க ஆரம்பித்தார். தற்போதைய பிசிசிஐ தலைவர் ரோஜர் பின்னி 22 ரன்கள் எடுத்து ஆட்டமிழந்தார்.

அதன் பின் வந்த ரவி சாஸ்திரி வந்த வேகத்தில் வெளியேற இந்திய அணி 78 ரன்களுக்கு 7 விக்கெட்களை இழந்து பரிதாபமான நிலையில் இருந்தது. ஆனால் மறுபக்கம் களத்தில் நிலைத்து இருந்த கேப்டன் கபில் தேவ் பொறுமையாக விளையாடி கொண்டிருந்தார். 60 ஓவர்கள் கொண்ட இன்னிங்ஸில் 35 ஓவர்கள் முடிவில் கபில் அரை சதத்தை எவ்வித பவுண்டரியும் இல்லாமல் கடந்து இருந்தார். விக்கெட் கீப்பர் சையத் கிர்மானி மற்றும் மதன் லால் அணியின் ஸ்கேரை உயர்த்த உதவினர். 60 ஓவர்கள் முடிவில் இந்திய அணி 266 ரன்களை குவித்தது. கேப்டன் கபில் தேவ் 138 பந்துகளில் 175 ரன்கள் குவித்து சிறப்பான ஆட்டத்தை வெளிபடுத்தினார்.

உலகக் கோப்பை வரலாற்றில் சிறந்த இன்னிங்ஸ்: உலக கோப்பை வரலாற்றில் மார்ட்டின் கப்டில் மற்றும் கிறிஸ் கெய்ல் போன்ற பேட்டர்கள் இரட்டை சதத்தை தாண்டி இருந்தாலும், உலக கோப்பையில் இக்கட்டான சூழ்ல் நிலையில், கபில் தேவின் இன்னிங்ஸ் சிறந்ததே.

1975ம் ஆண்டு உலக கோப்பையில் நியூசிலாந்து கேப்டன் கிளென் டர்னர் கிழக்கு ஆப்பிரிக்காவுக்கு எதிராக 171 ரன்கள் எடுத்ததே அதிகபட்சமாக இருந்தது. அதனை கபில் 1983ல் முறியடித்தார். பின்னர் 1987 உலக கோப்பையில் வெஸ்ட் இண்டீஸ் அணியின் வீரர் விவ் ரிச்சர்ட்ஸ் 181 ரன்கள் எடுத்து முறியடித்தார் என்பது குறிப்பிடத்தக்கது. இன்றைய காலகட்டத்தில் 200 ரன்களை தாண்டினாலும், அன்றைய நேரத்தில் இதுவே பெரிய சாதனையாக இருந்தது.

வீடியோ ஆதாரம் இல்லை: மைதானத்தில் இருந்த அனைவருமே அதிர்ஷ்டசாலிகள் என்றே கூறலாம். ஏனென்றால் உலகம் முழுவதும் பார்க்க முடியாத ஒரு சாதனையை அங்கு இருந்தவர்கள் பார்த்தார்கள். 1983 ஜூன் 18 அன்று பிசிசிஐ வேலை நிறுத்ததில் இருந்ததால் அந்த போட்டியை ஒளிபரப்பவில்லை. மேலும், இந்தியா ஜிம்பாப்வேயை 31 ரன்கள் வித்தியாசத்தில் வீழ்த்தியது. இந்த போட்டியில் ஆட்டநாயகனாக கபில் தேவ் தேர்வானார். அவர் பேட்டிங்கில் 175 ரன்கள் விளாசி பந்து வீச்சில் 1 விக்கெட்டையும் கைப்பற்றி இருந்தார் என்பது குறிப்பிடத்தக்கது.

இதையும் படிங்க:காதலிக்க மறுத்த இளம்பெண் கழுத்தறுத்து கொலை; நெல்லையில் இளைஞர் வெறிச்செயல்