கெபெர்ஹா :இந்திய அணி தென் ஆப்பிரிக்காவில் சுற்றுப்பயணம் மேற்கொண்டு தலா 3 போட்டிகள் கொண்ட டி20 மற்றும் ஒருநாள் கிரிக்கெட் மற்றும் 2 டெஸ்ட் கிரிக்கெட் போட்டிகளில் விளையாடி வருகிறது. டி20 கிரிக்கெட் தொடர் நிறைவு பெற்ற நிலையில் அதில் 1-க்கு 1 என்ற கணக்கில் சமனில் முடிந்தது.
இந்நிலையில், இந்தியா - தென் ஆப்பிரிக்கா அணிகள் இடையிலான ஒருநாள் கிரிக்கெட் தொடர் கடந்த டிசம்பர் 17ஆம் தேதி தொடங்கியது. முதலாவது ஒருநாள் கிரிக்கெட் போட்டியில் இந்திய அணி 8 விக்கெட் வித்தியாசத்தில் வெற்றி பெற்றது. தொடந்து இவ்விரு அணிகளுக்கு இடையிலான 2வது ஒருநாள் கிரிக்கெட் போட்டி இன்று (டிச. 19) கெபெர்ஹா மைதானத்தில் நடைபெறுகிறது.
டாஸ் வென்ற தென் ஆப்பிரிக்க அணியின் கேப்டன் எய்டன் மார்க்ராம் பந்துவீச்சை தேர்வு செய்தார். இந்திய அணியை பொறுத்தவரை பேட்டிங் பந்துவீச்சு என இரண்டிலும் பலம் வாய்ந்து காணப்படுகிறது. முதல் ஆட்டத்தில் போன்று தமிழக வீரர் சாய் சுதர்சன் இந்த ஆட்டத்திலும் அணிக்கு உறுதுணையாக இருந்து ரன் குவிப்பார் என எதிர்பார்க்கப்படுகிறது.
அதேபோல் ஒருநாள் கிரிக்கெட் போட்டியில் முதல் முறையாக ரிங்கு சிங் இன்றைய ஆட்டத்தின் மூலம் அறிமுகமாகிறார். டி20 கிரிக்கெட் தொடரில் விளையாடி வந்த அவர், இன்றைய ஆட்டத்தின் மூலம் சர்வதேச ஒருநாள் கிரிக்கெட் தொடரிலும் அவர் அறிமுகமாக உள்ளார். முன்னதாக இந்திய அணிக்கான தொப்பியை கேப்டன் அவரிடம் வழங்கினார்.